Qazaqstan byltyr da Ózbekstannyń eń iri saýda seriktesteriniń úshtigine endi

<p>TAShKENT. KAZINFORM &ndash; Ótken jyldyń qorytyndysy boıynsha Ózbekstannyń Qazaqstanmen syrtqy saýda aınalymy 4 mlrd dollardan asty, dep habarlaıdy Kazinform agenttiginiń menshikti tilshisi Álıhan Asqar.&nbsp;</p>

Statıstıka agenttiginiń málimetinshe, búginde Ózbekstan álemniń 198 elimen saýda-sattyq jasaıdy. 

Byltyr qańtar-jeltoqsan aılary aralyǵynda Ózbekstannyń syrtqy saýda aınalymy 62,6 mlrd dollar boldy. Bul ótken jyldyń sáıkes kezeńimen salystyrǵanda 23,9%-ǵa kóp. Jalpy kólemniń ishinde eksport 24 426,2 mln (+23,8%) dollar, al ımport 38 141,2 mln dollardy (+24%) qurady.

2023 jyldyń qorytyndysyna saı, eldiń basty saýda seriktesteri kóshin Qytaı bastady. Eki el arasyndaǵy taýar aınalymy - 13,7 mlrd dollar (jalpy kólemniń 21,9%).

Ekinshi orynǵa Reseı jaıǵasty. Ózbekstannyń bul memleketpen saýda-sattyǵy 9,88 mlrd dollarǵa (jalpy kólemniń 15,8%) jetti.

Sonymen qatar eń kóp taýar aınalymy bolǵan elder úshtigin Qazaqstan túıindep tur. ıAǵnı, bizdiń elmen Ózbekstan arasyndaǵy saýda kólemi 4,39 mlrd dollar (jalpy kólemniń 7%) boldy.

Eske salaıyq, byltyr Ózbekstan Qazaqstanǵa 121,2 mln dollardyń jemis-jıdegi men kókónisin eksporttaǵan.