Qazaqstan bıdaıynan mata jáne plastık óndiriletin bolady

ASTANA. QazAqparat - Beıjiń qalasynda ótken Qazaqstan-Qytaı Іskerlik keńesiniń otyrysynda «QazAzot» AQ, «Cathay Industrial Biotech, Ltd.» jáne «CITIC Construction Co., Ltd.» arasynda Qazaqstanda klasterdi damytý boıynsha jobalardy iske asyrý kelisimi jasaldy. Bul týraly «Kazakh Invest» AQ málim etti.

Joba bıdaıdy tereń óńdeý arqyly ınnovatsııalyq polıamıdti materıaldardy shyǵaratyn biregeı tehnologııany qamtıdy. Aldaǵy ýaqytta olar jasandy matalardyń, plastıkter men polımerlik jabyndylardyń óndirisi úshin paıdalanylatyn bolady. Álemde bul tehnologııany tek qytaılyq «Cathay Industrial Biotech, Ltd.» kompanııasy meńgergen. «Kazakh Invest» qoldaýymen qol qoıylǵan kelisimniń arqasynda ekinshi zaýytty Qazaqstan aýmaǵynda salý josparlanǵan.

Jobaǵa salynatyn ınvestıtsııa 2,5 mlrd AQSh dollaryn quraıdy. Bul - tolyǵymen eksportqa baǵyttalǵan joba. Oǵan jyl saıyn 2,5 mln tonna otandyq astyqty paıdalaný josparlanýda.

Eske salaıyq, Beıjiń qalasynda jalpy somasy 13 mlrd AQSh dollaryn quraıtyn ekonomıkalyq sıpattaǵy 40 qujatqa qol qoıyldy. Olardyń 15-i «Kazakh invest»-tiń qoldaýymen iske asty. Atalmysh kelisimderge sáıkes, Qazaqstan aýmaǵynda mashına jasaý, bıotehnologııalar salasyndaǵy jańa joǵary tehnologııalyq óndiristerdi iske qosý josparlanǵan.