Qazaqstan Bergen ýnıversıtetiniń professoryn marapattady

OSLO. QazAqparat – Oslodaǵy Qazaqstan Elshiliginde Bergen ýnıversıtetiniń professory Grý Mandtqa «Qazaqstan Respýblıkasynyń Táýelsizdigine 30 jyl» merekelik medali tabystaldy, dep habarlaıdy QazAqparat Syrtqy ister mınıstrligine silteme jasap.

2000-2006 jyldary Grý Mandt ıÝNESKO men Norvegııa Syrtqy ister mınıstrliginiń qoldaýymen uıymdastyrylǵan norvegııalyq mamandar tobynyń quramynda Almaty oblysyndaǵy Tańbaly petroglıfterin konservatsııalaý, prezentatsııalaý jáne basqarý jobasyna qatysqan. Nátıjesinde 2004 jyly Tamǵaly petroglıfteriniń kesheni ıÝNESKO-nyń Búkilálemdik mura tizimine endi.

Medaldi Memleket basshysy Qasym-Jomart Toqaevtyń atynan Elshi Ádil Tursynov tabys etti. Marapatty Grý Mandtyń uly – Tare Mandt Larsen men ǵalymnyń nemereleri qabyldady. Іs-sharaǵa Norvegııanyń Qazaqstandaǵy burynǵy Elshisi Ole Iohan Bernoı jáne «Tańbaly» jobasynyń norvegııalyq jetekshisi, arheolog Anna-Sofııa Hıgen qatysty.