Qazaqstan-Belarýs úkimetaralyq komıssııanyń otyrysy ótti
Qazaqstan Respýblıkasy Premer-Mınıstriniń orynbasary Roman Sklıar jáne Belarýs Respýblıkasy Premer-Mınıstriniń birinshi orynbasary Aleksandr Týrchın bastaǵan otyrystyń barysynda Qazaqstan Respýblıkasy men Belarýs Respýblıkasyndaǵy ekonomıkalyq ahýal týraly aqparat almasý boldy, sondaı-aq Qazaqstan-Belarýs saýda-ekonomıkalyq yntymaqtastyǵynyń aǵymdaǵy jaı-kúıi men damý perspektıvalary talqylandy.
Atap aıtqanda, taraptar ÚAK XIV otyrysynyń Hattamasyn iske asyrý, eki eldiń Úkimetteri arasyndaǵy yntymaqtastyqty damytýdyń 2019-2020 jyldarǵa arnalǵan is-sharalar josparyn iske asyrý bóligindegi ýaǵdalastyqtar men usynymdar týraly, Qazaqsan men Belarýs arasyndaǵy saýda-ekonomıkalyq yntymaqtastyq jáne ony keńeıtý perspektıvalary týraly, ónerkásiptik kooperatsııa men tehnıkany jetkizý salasyndaǵy, aýyl sharýashylyǵy men azyq-túlik ónerkásibi salasyndaǵy, densaýlyq saqtaý salasyndaǵy yntymaqtastyq týraly, mádenı-gýmanıtarlyq saladaǵy, ǵylym, tehnologııalar men bilim salalaryndaǵy, ǵarysh qyzmeti salasyndaǵy yntymaqtastyq týraly, sondaı-aq 2020 jyly Belarýs aýmaǵynda josparlanǵan Úkimetaralyq komıssııanyń XVI otyrysyn ótkizý týraly kelisti.
Otyrystaǵy sózinde Roman Sklıar, qabyldanǵan sheshimder Qazaqstan ‒ Belarýs yntymaqtastyǵynyń barlyq baǵyttary boıynsha ekijaqty qatynastardyń damýyna qosymsha túrtki beretinine, sondaı-aq kezekti ret Qazaqstan men Belarýs Respýblıkasy arasyndaǵy dıalogtyń qarqyndylyǵynyń bıik deńgeıin kórsetetinine senim bildirdi.
Sonymen qatar, Roman Sklıar eki elde jańa óndirister paıda bolyp, Qazaqstan men Belarýs bir-birine halyqaralyq standarttarǵa saı jáne halyqaralyq sapa sertıfıkattary bar joǵary sapaly óńdelgen ónimdi básekelestik baǵa boıynsha jetkize alatynyn atap ótti. Osymen, bıznesti júrgizý úshin jasalyp jatqan jaǵdaılar bizdiń elderdi kásipkerler men ınvestorlar úshin tartymdy qylýǵa múmkindik berdi.
Búgingi kúnde Qazaqstanda Belarýstyń qatysýymen 340-tan astam zańdy tulǵalar, fılıaldar men ókildikter jumys jasaıdy. Osy jaǵdaıda ÚAK mindeti – kásiporyndar men bıznes-seriktesterdiń ózara tıimdi jáne tabysty yntymaqtastyǵy úshin qolaıly jaǵdaılar jasaý.
Óz kezeginde, Belarýs Respýblıkasy Premer-Mınıstriniń birinshi orynbasary Aleksandr Týrchın ónerkásip, aýyl sharýashylyǵy, kólik, farmatsevtıka, medıtsına jáne AT salalaryndaǵy belarýstyq jáne qazaqstandyq kásiporyndardyń yntymaqtastyǵyn perspektıvti dep aıtty. Budan ózge, A. Týrchınniń aıtýynsha óndiristik kooperatsııa yntymaqtastyqtyń basym baǵyttarynyń qatarynda qala beredi.
Aleksandr Týrchın birlesken ónerkásiptik, ǵylymı, ınjenerlik-tehnıkalyq jáne kadrlyq áleýet kúrdeli jobalardy, sonyń ishinde óndiristerdi oqshaýlaýdyń joǵary dárejesimen iske asyrýǵa múmkindik beretinine senim bildirdi.