Qazaqstan Belarýspen birlesip qarýdyń jańa túrlerin shyǵarmaq

ASTANA. QazAqparat -Parlament Senaty jalpy otyrysynda «Qazaqstan Úkimeti men Belarýs Úkimeti arasyndaǵy ónerkásiptiń qorǵanys salalary uıymdarynyń óndiristik jáne ǵylymı-tehnıkalyq kooperatsııasy týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Kelisimniń negizgi maqsaty - eki eldiń qorǵanys ónerkásibi kásiporyndaryna memlekettik qoldaý kórsete otyryp, ózara tıimdi yntymaqtastyqty damytý. Kelisimdi ratıfıkatsııalaý - eksporttaý jáne ımporttaý operatsııalary kezinde týyndaıtyn negizgi ákimshilik kedergilerdi sheshýge yqpal etedi. Bul turǵyda ákelinetin áskerı ónimdi lıtsenzııalaýdan bosatady jáne olardy jetkizý merzimderin qysqartady»,- dedi QR Qorǵanys jáne aeroǵarysh ónerkásibi vıtse-mınıstri Amanııaz Erjanov.

Onyń sózine qaraǵanda, eki el arasynda ǵylymı-tehnıkalyq yntymaqtastyq aıasynda qarý-jaraq pen áskerı tehnıkanyń jańa túrin jasaýda birlesken ǵylymı zertteýler júrgiziledi, sondaı-aq qoldanystaǵy tehnıkany jańǵyrtý sharalary eskerilgen.

«Taraptar zııatkerlik menshikti qorǵaýdy qamtamasyz etý jáne ony ruqsatyz paıdalanýdyń aldyn alý sharalaryn qabyldaýǵa mindetteledi. ıAǵnı, Qazaqstan men Belarýs kásiporyndarynyń óndiristik jáne ǵylymı-tehnıkalyq baılanysy áskerı-tehnıkalyq ǵylymdardy damytýdy, sondaı-aq qarý-jaraq pen áskerı tehnıkanyń jańa túrleri óndirisin jetildirýge negizdelgen», - dedi A. Erjanov.

Kelisimdi ratıfıkatsııalaý bıýdjetten qosymsha shyǵyndardy talap etpeıdi jáne teris áleýmettik saldarǵa ákelip soqpaıdy.

Belgili bolǵandaı, elimiz memlekettik qorǵanys tapsyrysy aıasynda Belarýsten tikeleı áskerı tehnıka satyp alyp jatqan joq. Alaıda brondy tehnıkany, avıatsııalyq tehnıkany jóndeý sharalary eskerilgen. Qazaqstan óz kezeginde zeńbirek pen oǵan baılanysty ónimder jetkizedi.

Illıýstratsııalyq sýret