Qazaqstan Baıan-Ólgeıden mal satyp almaq nıette

BAıAN-ÓLGEI. QazAqparat -  Qazaqstan Baıan-Ólgeıden (Mońǵolııanyń aımaǵy-avt.) jylqy jáne qoı maldaryn tirideı satyp alýǵa nıet bildirgen. Biraq bul másele zańmen rettelmegendikten kedergige ushyrap tur.  Bul týraly Baıan-Ólgeıde ótken «Bıznes forým Ólgeı - 2018» atty forým barysynda «ET-tranzıt» kompanııasynyń dırektory Talǵat Áýketaıuly málim etti, dep habarlaıdy QazAqparat tilshisi.

Baıan-ólgeılik kásipkerdiń aıtýynsha, Qazaqstannyń Jambyl, Semeı, Óskemen oblystarynyń birqatar kompanııalary tiri mal satyp alý týraly usynys jasaǵan. Bundaı usynys Qyrǵyzstan kásipkerleri tarapynan da túsken. Olar atalmysh jumysty Mońǵol eliniń tıisti zańnamalyq aktileri aıasynda uıymdastyrýdy qoldaıdy. 

«Bıylǵy jyly Mońǵol úkimeti Eýropa elderine, Azııaǵa onyń ishinde Vetnam, Laos Halyqtyq Demokratııalyq Respýblıkasyna, Iran, Birikken Arab Ámirlikterine eksportqa et shyǵarýǵa kelisimshart jasasqan. Atalmysh jospardy júzege asyrý barysynda, Baıan-Ólgeı aımaǵy basty mańyzǵa ıe. Sebebi, qazirgi jaǵdaımen qaraǵanda, Mońǵolııanyń batys aımaqtary  maldyń juqpaly indetterinen ada. Bul bir jaǵynan óńirdegi az qazaqtyń turmys jaǵdaıyn jaqsarta túsýge sep bolar edi», - deıdi Talǵat Áýketaıuly.  

Aıta keterligi, Mońǵolııada shet elderge tirideı mal shyǵarý isi zańmen rettelmegen. Sonymen qatar, Mońǵolııa osydan úsh jyl buryn Qytaı men Reseıge eksportqa tirideı mal shyǵara bastap, keıinnen buǵan halyq qarsy shyqqan. Oǵan sebep, eksportqa shyqqan jylqy malyna Qytaı azamattarynyń jasaǵan qııanaty edi. Bul áreket bes túlik  malyn qazyna sanaıtyn kóshpendilerdiń jırenish sezimin týǵyzyp, sol kezdegi Vıtse-premer mınıstr, qázirgi Úkimetbasshysy Ýhnaagıın Húrelsúh shetelderge eksportqa tirideı mal shyǵarýǵa sanktsııa salǵan bolatyn.

Al Talǵat Áýketaıuly bolsa Qytaı men qazaq halqyn salystyrýǵa kelmeıtinin aıtyp, máseleni zań júzinde retteý qajettigin alǵa tartady. «Qazaqtar da kóshpendi el, malmen qalaı qatynasýdy jáne mal qadirin biledi.  Sondyqtan Úkimet atalmysh sheshimin Qazaqstanǵa qarsy qoldanbasa dep oılaımyz», - deıdi ol.

Aıta keterligi, «ET-tranzıt» kompanııasy 2005 jyldan beri úzdiksiz qyzmet júrgizip kele jatqan kompanııa. Táýiligine 140-150 iri qara, 400-500 usaq mal etin daıyndap, 1 000 tonnaǵa deıin et muzdata alady. 2018 jyldan bastap jylqy, qoı etterin Qyrǵyzstanǵa shyǵara bastaǵan.

Eske sala ketsek, bıylǵy jyly Mońǵolııada mal basy 66 mln-ǵa jýyqtaǵan, sonyń ishinde Baıan-Ólgeıde 2 mln-nan astam mal bar.

Avtor: Qýat Ýathan

Foto: spkpavlodar.kz