«Qazaqstan barysynda» Atyraý oblysynyń namysyn qorǵaıtyn balýandar anyqtaldy

ATYRAÝ. QazAqparat «Qazaqstan barysy» respýblıkalyq týrnıriniń fınaldyq kezeńinde Atyraý oblysynyń namysyn Suńǵat Zakarııaev jáne Nurjan Baıbosynov qorǵaıdy, dep habarlaıdy QazAqparat.

5 mamyr kúni «Atyraý» sport kesheninde qazaq kúresinen «Qazaqstan barysy» respýblıkalyq týrnırine irikteý saıysy márege jetti.

Jarysqa Atyraý qalasy men 7 aýdannan 16 balýan qatysty. Olardyń bir-birimen kúresý reti jerebe arqyly anyqtaldy.

Kil myqtydan eń myqtyny anyqtaýǵa jınalǵan balýandar beldesýi tartysqa toly boldy. Bir-birine qarsy sátti ádis jasap, keıde upaı sanymen utylǵan balýandar «Atyraý barysy – 2022» ataǵyn ıelený úshin baryn saldy.

Nátıjesinde Qyzylqoǵa aýdanynyń ókili Suńǵat Zakarııaevke teń keler qarsylas bolmady. Osylaısha ol «Atyraý barysy – 2022» ataǵyna ıe boldy.

S. Zakarııaev qazaq kúresinen osymen altynshy márte úzdik atanyp otyr.

Aqtyq beldesýde jeńilgen Nurjan Baıbosynov ekinshi oryn ıelendi. Bul balýan saıysqa Atyraý qalasynyń atynan qatysty.

Al Ádilet Saparǵalıev úshinshi júldeni mise tutty. Ol Maqat aýdanynyń namysyn qorǵady.

«Saıys jeńimpazdaryna arnaıy chempıondyq beldik pen qarjylaı syıaqy tabys etildi. Birinshi júlde ıegeri Suńǵat Zakarııaev – 250 myń, ekinshi oryn alǵan Nurjan Baıbosynov – 150 myń, úshinshi júldeniń ıesi Ádilet Saparǵalıev 100 myń teńge aldy», - dep habarlady oblystyq Dene shynyqtyrý jáne sport basqarmasynyń baspasóz qyzmetinen.

Eske salaıyq, buǵan deıin atyraýlyq paradzıýdoshy Amanjol Janbota Gran-Prı saıysynyń jeńimpazy atanǵanyn habarlaǵan bolatynbyz.