«Qazaqstan Barysyna» Qaraǵandy oblysynan 2 palýan barady

QARAǴANDY. QazAqparat – «Qazaqstan Barysy» respýblıkalyq týrnıriniń fınalyna Qaraǵandy oblysynan Erqanat Moldaǵulov pen Aqjigit Oralov baratyn boldy, dep habarlaıdy QazAqparat tilshisi.

Qaraǵandyda «Jastar» sport kesheninde qazaq kúresinen «Saryarqa Barysy» oblystyq týrnıri ótti. Kil myqty palýan ataǵy úshin 26 sportshy kúsh synasty. Nátıjesinde Buqar Jyraý aýdanynan Erqanat Moldaǵulov jeńiske jetti.

Ekinshi oryndy Shet aýdanynyń týmasy Aqjigit Oralov, úshinshi oryndy Jezqazǵannan kelgen balýan Bekzat Ermekov ıelendi.

«Bul týrnır 11-shi ret ótkizilip otyr. Atalmysh ulttyq sport túriniń tanylýy jyl saıyn artyp keledi Jas balýandardyń sany da artýda. Óńirlik týrlardyń nátıjeleri boıynsha eki myqty sportshy «Qazaqstan Barysy» respýblıkalyq týrnırine joldama alady», - dep atap ótti «Qazaqstan Barysy» qazaq kúresin damytý qorynyń sportmenedjeri Jasulan Musabekov.

Bıyl «Qazaqstan Barysy» respýblıkalyq týrnıri 3 shilde kúni Nur-Sultanda ótedi. Qaraǵandy oblysynyń namysyn Erqanat Moldaǵulov pen Aqjigit Oralov qorǵaıtyn bolady.