Qazaqstan Barysy: Jartylaı fınalǵa shyqqan balýandar anyqtaldy

  ASTANA. QazAQparat - «Barys Arena» sport kesheninde ótip jatqan «Qazaqstan Barysy» VIII Respýblıkalyq týrnıriniń jartylaı fınalyna shyqqan balýandardyń esimderi belgili boldy, dep habarlaıdy QazAqparat tilshisi.

Shırek fınalda alǵash bolyp boz kilemge shyqqan Aıbek Nuǵymarov pen Dáýren Nuralınov arasyndaǵy beldesý shyǵysqazaqstandyq Aıbektiń jeńisimen aıaqtalsa, ekinshi bolyp Maqsat Isaǵabylov pen Erjan Shynkeev ózara myqtyny anyqtady. Nátıjesinde Shynkeev qarsylasyn aıqyn basymdylyqpen utyp, jartylaı fınalǵa joldama aldy.

Al, ótken jyly «Qazaqstan Barysy» atanǵan  Elaman Erǵalıev pen  Erasyl Qajybaev arasyndaǵy asa tartysty ótken beldesý negizgi ýaqytta teń tátıjemen aıaqtaldy. Qosymsha ýaqyttaǵy qoıanqoltyq beldesýde  «Ásker barysy» Erasyl Qajybaev qarsylasyn utyp, jartylaı fınalǵa shyqqan úshinshi balýan atandy. Al tórtinshi bolyp jartylaı fınalǵa «Qazaqstan Barysyna» tuńǵysh qatysyp otyrǵan  Ersultan Muzapparov shyqty.

Endi jartylaı fınalda Aıbek Nuǵymarov pen Erjan Shynkeev beldesetin bolsa, onda Erasyl Qajybaev pen Ersultan Muzapparov beldesedi.