«Qazaqstan barysy» týrnıriniń bıylǵy ereksheligi nede

ASTANA. QazAqparat – Elorda kúni qarsańynda dástúrli «Qazaqstan barysy» respýblıkalyq týrnıri ótedi, dep habarlaıdy QazAqparat tilshisi.

«Bıyl týrnır jyldaǵydan qaraǵanda ózgeshe ótkeli otyr. Jańa oblystardyń ashylýyna baılanysty jarysqa qatysýshylardyń sany artty. Bıyl 41 palýan baq synaıdy. Onyń ishinde 33 palýan oblystardan, 2 sportshy «Ásker barysynan» jáne 3 qaladan taǵy 6 sportshy qatysady», - dedi «Qazaq kúresi» qaýymdastyǵy tóreshiler alqasynyń tóraǵasy Qaırat Pazylbek «Qazaqstan barysy» týrnırine oraı elordada ótken baspasóz máslıhatynda.

Onyń aıtýynsha, irikteý kezeńi barlyq oblysta ótti.

«Іrikteý aldymen aýdan ortalyǵynan bastalady. Odan ótkender oblystyq synaqqa joldama alady. «Qazaqstan barysy» týrnıri – qazaq kúresin damyta túsýge serpin bergen joba. Palýandar bul sharany asyǵa kútedi», - dedi ol.

Erteń saǵat 19:00-de «Hanshatyr» oıyn-saýyq ortalyǵynda palýandardyń salmaq ólsheý rásimi ótedi.

Týrnır 2 shilde kúni «Barys Arena» sport kesheninde saǵat 12:00-de bastalady. Kirý tegin.

Uıymdastyrýshylardyń málimetinshe, týrnırdiń jalpy júlde qory – 40 mln teńge, onyń ishinde jarys jeńimpazyna 25 mln teńge syıaqy beriledi.

Buǵan deıin týrnır uıymdastyrýshylary jarysty ótkizýge bólingen qarjynyń jumsalý zańdylyǵyna qatysty túsinik bergen edi.

Sonymen qatar, brıfıng barysynda batysqazaqstandyq palýandardyń bıylǵy týrnırden shettetilgeni aıtyldy.

Odan bólek, qazaq kúresin Olımpıada baǵdarlamasyna engizý jumysy júrip jatqany habarlandy.