«Qazaqstan Barysy» respýblıkalyq týrnırine qatysatyn qaraǵandylyq balýandar irikteldi

QARAǴANDY. QazAqparat – Serik Sápıev atyndaǵy boks ortalyǵynda qazaq kúresinen eresekter arasynda «Saryarqa Barysy» oblystyq týrnıri ótti, dep habarlaıdy QazAqparat tilshisi. Bul, QR Tuńǵysh Prezıdenti Nursultan Nazarbaevtyń júldesi úshin respýblıkalyq jarystarǵa irikteý dodasy boldy. Jarysqa oblystyń barlyq qalalary men aýdandarynan 130 balýan qatysty.

Týrnırdiń bas tóreshisi Nurmuhamed Jaılaýbaıdyń aıtýynsha, pandemııaǵa baılanysty jattyǵýlardyń azdyǵyna qaramastan, palýandar jaqsy daıyndalyp, laıyqty nátıjeler kórsetti.

«Jarys 11 salmaq dárejesinde ótti. Fınalda óte qıyn boldy, sebebi eki myqty sportshy – Aqjigit Oralov pen Bekzat Ahmetbekov kúresti. Olar shilde aıynda Nur-Sultanda ótetin «Qazaqstan Barysy» respýblıkalyq týrnırinde Qaraǵandy oblysynyń namysyn qorǵaýǵa barady», – dedi Nurmuhamed Jaılaýbaı.

Oblystyq týrnırdiń jeńimpazy qaraǵandylyq Aqjigit Oralov boldy. Ekinshi oryndy Nura aýdanynan Bekzat Ahmetbekov, úshinshi oryndy Buqar Jyraý aýdanynan Erqanat Moldaǵulov ıelendi.

«Qazaq kúresimen 12 jyl boıy aınalysyp kelemin. Dzıýdo jáne sambomen de shuǵyldanamyn. Búgingi jarys ońaı bolǵan joq, biraq bári jaqsy ótti. Barlyq fınalıster myqty. Endi respýblıkalyq týrnırge daıyndalamyz», – deıdi Aqjigit Oralov.