Qazaqstan barysy: Aıbek Nuǵymarov Dáýlethan Jaqypovty jeńip, kelesi kezeńge ótti

NUR-SULTAN. QazAqparat - 2013 jylǵy «Qazaqstan barysy» Aıbek Nuǵymarov elordada ótip jatqan «Qazaqstan barysy» týrnırinde alǵashqy kezdesýin jambyldyq Dáýlethan Jaqypovpen ótkizdi, dep habarlaıdy QazAqparat tilshisi.

Jerebe boıynsha týrnırde 144 keli salmaǵy bar Aıbek Nuǵymarov pen 93 kelilik Dáýlethan Jaqypov kezdesip qaldy. Salmaqtary saı kelmese de, Dáýlethan óziniń osal emes ekenin aıqyn tanytty. Alǵashqy úsh mınýtta Aıbek alǵa shyqqan edi. Beldesý barysynda Dáýlethan bir eskertý alyp qaldy. Beldesý aıaqtalýǵa 1 mınýt 40 sekýnd qalǵanda Aıbek jartylaı jeńispen basymdyqqa ıe boldy. Dáýlethan beldesý aıaqtalǵannan keıin bir búk upaı alyp úlgergen edi. Alaıda jeńis Aıbektiń qanjyǵasynda ketti.

Aıbek Nuǵymarov kelesi beldesýin «Halyq barysy» atanǵan Dáýlet Nuralınovpen ótizedi.

Eske sala ketsek, elordanyń «Barys-Arena» sport kesheninde «Qazaqstan barysy - 2019» týrnıri ótip jatyr. Respýblıkalyq týrnırdi «Qazaqstan» jáne «Qazsport» telearnalary tikeleı efırde kórsetýde.

Uıymdastyrýshylar osy ýaqytqa deıin aıtqandaı, fınaldyq básekede elimizdiń túkpir-túkpirinen kelgen 35 balýan beldesedi. Bıylǵy jarystyń júlde qory da qomaqty. Jeńimpazǵa 25 mıllıon teńgeden bólek, altyn belbeý men altynnan quıylǵan aýyspaly «Taıtuıaq» tabys etiledi. ІІ jáne ІІІ orynǵa ıe bolǵan sportshylarǵa sáıkesinshe 5 mıllıon 500 myń jáne 1 mıllıon 800 myń teńge beriledi. Sonymen qatar palýandarǵa ár jeńisi úshin 100 myń teńge aqshalaı syılyq tabystalady.