«Qazaqstan barysy»: 1/8 fınal aıaqtaldy

ASTANA. QazAqparat – Elordadaǵy «Barys Arena» sport kesheninde ótken «Qazaqstan barysy-2023» respýblıkalyq týrnıriniń 1/8 fınaly márege jetti, dep habarlaıdy QazAqparat tilshisi.

Shymkenttik Ersultan Muzaparov pen qaraǵandylyq jas balýan, týrnır debıýtanty Aqjol Dúısenbaev beldesti. Tartysty aıqasta shymkenttik balýannyń baǵy jandy.

Ekinshi beldesýde Pavlodar oblysynyń balýany Muhtar Dálelhanuly «Qostanaı oblysynyń barysy» Almas Jumaǵalıdy jyqty.

«Mańǵystaý oblysynyń barysy» týrnırdegi eń aýyr balýannyń biri (155 keli) Nurdáýlet Jarylǵapov Soltústik Qazaqstan oblysynyń úmiti Altynbek Aýsaǵıtovti «beldesý» kezeńinde utty.

Bıyl Jetisý oblysynyń nymysyn qorǵap júrgen Rýslan Ábdirazaqov birinshi aınalymda 2021 jylǵy «Qazaqstan barysy» Dáýren Nuralınovti jyqqan Danıl Fedorovpen kúresip, «taza jeńispen» basym tústi.

«Ásker barysy» Marat Baıqamyrov Jambyl oblysynyń balýany Azat Rysbekten eskertýler sany boıynsha basym tústi.

Qyzylorda oblysynyń úmiti Aıbek Serikbaev ulytaýlyq jas barys (2003 jylǵy) Erasyl Nuǵumatty aıqyn basymdyqpen jeńdi.

Taǵy bir «Ásker barysy» Ǵalymjan Qyryqbaı «Atyraý oblysynyń barysy» Arman Qalıevti utyp ketti.

2022 jylǵy «Qazaqstan barysy» Maqsat Isaǵabylovty birinshi aınalymda qapy qaldyrǵan «Almaty oblysynyń barysy» Nurǵalı Joltaev Shyǵys Qazaqstan oblysynyń balýany Saıat Shamshıevten jyǵylyp qaldy.