Qazaqstan barlaýshylary UQShU-ǵa qatysýshy elderdiń «Іzdestirý-2016» oqý-jattyǵýyna qatysady (FOTO)

ASTANA. QazAqparat - Búgin Tájikstanda UQShU múshe memleketteri Qarýly Kúshteriniń barlaý kúshteri men quraldarynyń «Іzdestirý-2016» birlesken oqý-jattyǵýy bastaldy. Oǵan qazaqstandyq áskerı qyzmetshiler de qatysýda, dep habarlady QR Qorǵanys mınıstrliginiń baspasóz qyzmetinen.

Oqý-jattyǵý Qazaqstan Respýblıkasy Qarýly Kúshteriniń «Magob» oqý-jattyǵý ortalyǵynyń polıgonynda jáne Reseı Federatsııasy Qarýly Kúshteri 201-shi áskerı bazasynyń «Lıaýr» polıgonynda ótýde.

Oqý-jattyǵýǵa Belarýs, Qazaqstan, Qyrǵyz Respýblıkasy, Reseı jáne Tájikstan Qarýly Kúshteriniń quramynan áskerı, arnaıy, radıoelektrondyq, áýe barlaýy bólimsheleriniń áskerı qyzmetshileri, barlyǵy 1 500-ge jýyq áskerı qyzmetshi, sondaı-aq armııalyq, jedel-taktıkalyq jáne áskerı-kóliktik avıatsııa bólimsheleri qatysady.
Áskerler toptamasynyń barlaý bólimsheleri oqý-jattyǵý barysynda taýlarda barlaýdy júrgizý, barlaý aqparatyn jınaý, óńdeý, taldaý jáne aqparat almasý, sondaı-aq tańsyq jerde óte mańyzdy nysandardy basyp alý jáne joıý jóninde arnaıy operatsııalar barysyndaǵy is-qımyldar tájirıbesin jınaqtaıdy.

«Biz qoıyp otyrǵan basty mindet - ol UQShU-nyń ártúrli múshe memleketteriniń barlaý quraldaryn basqarý máselelerin pysyqtaý, sondaı-aq birlesken is-qımyldarǵa arnalǵan áskerı barlaý arnaıy bólimsheleriniń tájirıbe jınaqtaýy bolyp tabylady. Kóptegen memleketter ózderiniń tehnıkalyq barlaý quraldaryn alyp kelgeni asa mańyzdy bolyp otyr. Olardyń barlyǵy tartylady. Osy quraldarmen ártúrli memleketterdiń ókilderi tanys bolady. Bul bizge olardy birizdendirýge, al eń bastysy tapsyrmalardy oryndaý kezinde olardy paıdalaný tıimdiligin arttyrýǵa múmkindik beredi», - dedi UQShU-nyń Bas hatshysy Nıkolaı Bordıýja.
Arnaıy oqý-jattyǵýlardyń maqsaty - qarsylasty joıý múddesinde barlaý aqparatyn jınaý, taldaý, óńdeý jáne jetkizý júıesin jetildirý, sondaı-aq barlaýdy uıymdastyrýda basqarý organdarynyń qabilettiligin tekserý.