Qazaqstan bankteriniń tabysy 40%-ke azaıdy

ASTANA. QazAqparat - 2017 jyldyń qańtar-shilde aralyǵynda bank sektorynyń tabysy ótken jyldyń osy kezeńimen salystyrǵanda 40,0%-ke nemese 17,8 trln teńgege qysqarǵan. Ol kezde bankterdiń tabysy 5 esege artyp, 29,6 trln teńgeni quraǵan edi, dep habarlaıdy ranking.kz.

Aǵymdaǵy jyldyń basynan beri shyǵyndar kólemi 17,9 trln teńgege jetken, bul 2016 jyldyń qańtar-shilde aralyǵyndaǵy kórsetkishpen salystyrǵanda 38,9%-ǵa az. 2016 jyldyń qańtar-shilde aılary aralyǵynda bank shyǵyndary 29,4 trln teńgeni qurap, bir jyldyń ishinde 5 esege ósken. Nátıjesinde 2017 jyldyń shildesinde kiris salyǵyna jumsalǵan shyǵyndardy esepke alǵanda QR Ekinshi deńgeıli bankteriniń (EDB) shyǵyny 203,9 mlrd tg jetse, 2016 jyldyń shildesinde bankterdiń paıdasy - 243,8 mlrd tg bolǵan edi.

«Syıaqy alýǵa baılanysty emes tabystar jalpy EDB tabystarynyń 91,7%-yn - 16,3 trln tg quraıdy, bul 2016 jyldyń qańtar-shildesimen salystyrǵanda 42,6%-ǵa az», - delingen habarlamada.

Syıaqy alýmen baılanysty emes shyǵyndar 17,1 trln tg jetse, jalpy shyǵyndardyń úlesi - 95,5%-dy quraǵan. 2015 - 2016 jyldardyń qańtar-shilde aralyǵynda shyǵyndardyń 5 esege artýynan keıin, sońǵy jyldary olardyń kólemi 40,2%-ǵa qysqarǵan.