Qazaqstan bankterine hakerler shabýyly kóbeıýi múmkin - UQK

ASTANA. QazAqparat - Bankterdiń aqparattyq júıelerine vırýstyq shabýyldardyń kúsheıýi boljanyp otyr. Búgin Astanada kıbershabýyldarǵa tosqaýyl qoıýǵa arnalǵan forýmda UQK-nyń Memlekettik tehnıkalyq qyzmetindegi zııandy kodtardy zertteý zerthanasynyń jetekshisi Oleg Bıl osylaı málim etti, dep habarlaıdy QazAqparat.

«Memlekettik emes sektordaǵy iri uıymdar bizdiń kómegimizge júginbeıtini ókinishti. Sonymen qatar memlekettik uıymdar da ózderiniń problemalarymen bizge kelmeıdi. Ótken jyly dál osy sharada birqatar boljamdardy aıtqan bolatynmyn. Mysaly, bankterge jasalatyn shabýyldarǵa toqtalsam, bul turǵyda klıentter, ishki protsester, postermınaldar, bankomattar, saýda núkteleri sekildi barlyq sektorlar qamtyldy. Boljamym dál kelip, osy qaterler Qazaqstanǵa keldi. Biz bilemiz, elimiz bankterine qaterli shabýyldardyń biri oryn aldy. Osy oraıda bul shabýyldyń ósimin boljap otyrmyz. Ázirge, bizdi Reseı qutqaryp keledi. Nege? Sebebi olarda álsiz qorǵalǵan usaq bankter óte kóp. Sondyqtan hakerler salystyrmaly túrde bizdiń iri bankterge shabýyl jasaýdy qajetsinbeı tur», - dep toqtaldy O. Bıl.

Onyń sózine qaraǵanda, ózge de boljamdar oryndalǵan kórinedi. Máselen, mańyzdy nysandarǵa shabýyl jasaýdyń ádisi ózgergen, ıaǵnı hakerler qorǵanysty aınalyp ótýge mashyqtanyp aldy. Bul turǵyda Ońtústik Koreıada iri kompanııanyń ınfraqurylymy isten shyǵyp qaldy. Atap aıtqanda, hakerlerge aqsha tólese, olar kez kelgen kásiporynnyń aqparattyq júıesin buzýǵa qaýqarly.

Budan buryn habarlanǵandaı, forým barysynda Qorǵanys jáne aeroǵarysh mınıstrligi Aqparattyq qaýipsizdik komıteti tóraǵacynyń orynbasary Rýslan Ábdiqalyqov elimizde kıbershabýyldar tolqyny kúsheıýi múmkin ekeni aıtqan bolatyn.