Qazaqstan bankterinde Reseı men Belarýstiń rezıdent-jeke tulǵalary úshin 11 940 shot ashyldy
«2022 jylǵy 24 aqpannan beri Qazaqstan bankterinde Reseı men Belarýstiń rezıdent-jeke tulǵalary úshin 11 940 shot ashylǵan. Onyń ishinde 10 725 shot ótinish berýshiniń nemese senim bildirilgen adamnyń Qazaqstan bankinde jeke bolýy arqyly, 1 215 shot qashyqtan ashyldy. Nátıjesinde atalǵan memleketterdiń Qazaqstan Respýblıkasynyń bankterinde shottary bar azamattarynyń jalpy sany 162 myńǵa jetti», - dep atap ótedi agenttikten.
Vedomstvo málimetinshe, Reseı Federatsııasynyń rezıdent-zańdy tulǵalarynyń jańa shottarynyń sany jyl basynan beri azdap ósken. Osy jylǵy aqpannyń sońynan beri 7 Reseı kompanııasyna bank shottary ashylǵan, Qazaqstan bankterinde shottary bar Reseı uıymdarynyń jalpy sany 805-ke jetti.
Qazirgi ýaqytta barlyq sheteldik azamattar men kompanııalar úshin bank shottaryn ashý jáne júrgizý tártibi qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zań (KJTQQ) normalarymen, sondaı-aq Ulttyq bank pen agenttiktiń retteýshilik talaptarymen rettelgen.
Osylaısha, Ulttyq banktiń 2016 jylǵy 31 tamyzdaǵy 207 qaǵıdalarynyń talaptaryna sáıkes shotty ashý oflaın rejımde de, elektrondyq ótinish arqyly onlaın da júrgizilýi múmkin. Bank shotyn ashqanǵa deıin júginý tásiline qaramastan, bankter sheteldik ótinish berýshige KJTQQ týraly zańda belgilengen KYC (Know Your Customer) standarttary boıynsha tıisinshe tekserý júrgizýge mindetti.
Tıisti tekserý aıasynda bankter:
- sheteldik jeke tulǵany, zańdy tulǵany jáne onyń benefıtsıarlyq menshik ıelerin ıdentıfıkattaýdy, onyń ishinde alynǵan ıdentıfıkattaý derekteriniń durystyǵyn tekserýdi;
- iskerlik qatynastardyń boljamdy maqsaty men sıpatyn belgileýdi júrgizedi.
Budan basqa, agenttiktiń 2020 jylǵy 22 naýryzdaǵy 18 qaǵıdalarynda belgilengen táýekelderdi basqarý jáne ishki baqylaý júıelerine qoıylatyn talaptarǵa sáıkes komplaens táýekeldi basqarý maqsatynda bankter sheteldik, onyń ishinde transshekaralyq sıpattaǵy klıentterdiń operatsııalaryna kúsheıtilgen monıtorıng júrgizýge mindetti.
Kúsheıtilgen monıtorıng sheńberinde kúdikti mámilelerdi anyqtaý jáne táýekeli joǵary tranzaktsııalarǵa jol bermeý úshin bankter klıenttiń aqshasynyń shyǵý kózderin jáne onyń kontragentiniń zańdy mártebesin, júrgiziletin operatsııanyń sharttary men ekonomıkalyq mánin qosymsha taldaıdy.