Qazaqstan banki Qarjy mınıstri Erulan Jamaýbaevty sotqa beredi – feık

ASTANA. QazAqparat – «Qazaqstan banki tikeleı efırde aıtqan sózi úshin Erulan Jamaýbaevty sotqa beredi». Osyndaı taqyryppen maqala jarııalanǵan saıt paıda boldy. Materıalda Premer-Mınıstrdiń orynbasary - Qarjy mınıstri Erulan Jamaýbaevtyń «Qazaqstan» telearnasyna bergen suhbaty jaıly áńgime keltirilgen. Bul – jalǵan maqala, dep habarlaıdy QazAqparat stopfake-ke silteme jasap.

Maqala bógde saıtta ornalastyrylǵan, biraq dızaıny jaǵynan nur.kz portalyna usqaıdy. Onda 2023 jylǵy 17 aqpanda tikeleı efırde ótken baǵdarlamadan sýretter berilgen. Sonymen qatar, mátinde krıptovalıýta naryǵynda saýda jasaýǵa arnalǵan bot jarnamalanǵan.

3 tamyzda orys tilinde shyqqan bul jazbasha suhbat – feık. Ol tolyǵymen oıdan shyǵarylǵan jáne shyndyqqa janaspaıdy.

Baǵdarlamanyń túpnusqa jazbasy, ıaǵnı tikeleı efırde qazaq tilinde júrgizilgen suhbat «Qazaqstan» telearnasynyń Youtube paraqshasynda bar. Tikeleı efır kezinde maqalada jazylǵan aqparattar aıtylmaǵan.