Qazaqstan Bangkokta «Jasyl kópir» astanalyq bastamasyn tanystyrdy

ASTANA. QazAqparat - 6 qyrkúıek kúni Bangkok qalasynda Qorshaǵan ortany qorǵaý mınıstrleriniń VII Azııalyq-Tynyq muhıt sammıti ótti, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.  

Atalǵan sammıt sheńberinde QR Energetıka mınıstrligi men QR Syrtqy ister mınıstrligi «Jasyl kópir astanalyq bastamasy - turaqty damý úshin óńiraralyq yntymaqtastyqtyń jańa perspektıvalary» taqyrybynda saıd-ıvent uıymdastyrdy.

Saıd-ıventte «Arnasaı» bilimdi taratý ortalyǵynyń tájirıbesin, «Jasyl tehnologııalardy» damytý jónindegi Halyqaralyq ortalyǵyn qurýdy qosa alǵanda, «Jasyl kópir» seriktestik baǵdarlamasyn júzege asyrýdyń jetistikteri men perspektıvasy máseleleri talqylandy.

ESKATO men áriptes elder «Jasyl kópir» astanalyq bastamasynyń damýyna jáne Ortalyqty qurý máselelerine erekshe mán beredi.

Shara barysynda QR energetıka vıtse-mınıstri Ǵanı Sádibekov sóz sóıledi, moderator BUU Bas hatshysynyń orynbasary, ESKATO atqarýshy dırektory Shamshad Ahtar boldy.

Samoa Qorshaǵan ortany qorǵaý mınıstri Taefý Lemı, Taıland Koroldigindegi Bangladesh jáne Fınlıandııanyń tótenshe jáne ókiletti elshileri jáne Mońǵolııa men Koreıa mınıstrlikteriniń ókilderi baıandama jasady.

Astananyń «Jasyl kópir» óńirlik bastamasy 2010 jyly Qorshaǵan ortany qorǵaý jáne Azııa - Tynyq muhıt aımaǵyn damytý boıynsha VI mınıstrler konferentsııasynda qoldaý tapqan bolatyn Keıinnen Qazaqstan Respýblıkasynyń Prezıdenti «Jasyl kópir» seriktestik baǵdarlamasy boıynsha bastamany usyndy. Ol keńinen halyqaralyq qoldaý tapty jáne Rıo+20 turaqty damý boıynsha BUU Konferentsııasynyń qorytyndy qujatyna endi.