​​Qazaqstan balabaqshalarynda «Tilge boılaý» biregeı jobasy bastaldy

<p>ASTANA. KAZINFORM - QR Oqý-aǵartý mınıstrligi Balalardy erte damytý ınstıtýty mektepke deıingi balalardyń memlekettik tildi tereń meńgerýine arnalǵan &laquo;Tilge boılaý&raquo; jobasyn ázirledi.</p>

Búgingi kúni bul pılottyq joba elimizdiń 135 mektepke deıingi uıymynda júzege asyrylýda.

«Tilge boılaý» jobasy balalardy memlekettik tildi meńgerýge yntalandyratyn jaıly tildik orta qalyptastyrýǵa baǵyttalǵan. Oqý jyl saıyn ártúrli baǵytta uıymdastyrylady: kommýnıkatıvti, oıyn túrinde, eńbek arqyly, kórkem, teatrlandyrylǵan jáne óz betinshe.

«Halyqaralyq ınnovatsııalyq tájirıbege negizdelgen bul tásil balanyń shyǵarmashylyq damýyn yntalandyryp, onyń oqýyna qoldaý kórsetedi. Mundaı tásildiń erekshelikteriniń biri – balalardyń shyǵarmashylyǵyn shektemeı, kerisinshe damytýǵa baǵyttalǵan. Ol balalardyń sózdik logıkasyn, sóıleý daǵdysyn damytady. Qazirgi ýaqytta joba elimizdiń bes óńirinde júzege asyrylýda», - dep atap ótti Mektepke deıingi bilim berý departamentiniń dırektory Manar Adamova.

Balalardyń baǵdarlama mazmunyn meńgerýiniń tıimdiligin baqylaý maqsatynda aı saıynǵy monıtorıng júrgiziledi. Qazirgi ýaqytta jobaǵa qatysýshy 750-den astam pedagog biliktilikti arttyrý kýrsynan ótti, olarǵa endigi kezekte turaqty túrde ádistemelik qoldaý uıymdastyrylady.