Qazaqstan-BAÁ arasyndaǵy taýar aınalymy 50 paıyzǵa artty - Úkimet

ASTANA. QazAqparat - Birikken Arab Ámirlikterine resmı sapary barysynda QR Premer-Mınıstri Álıhan Smaıylov BAÁ Premer-Mınıstriniń orynbasary – Prezıdent Ákimshiliginiń mınıstri sheıh Mansýr ben Zaıd Ál Nahaıanmen kezdesý ótkizdi, dep habarlaıdy QazAqparat Úkimettiń resmı saıtyna silteme jasap.

Álıhan Smaıylov Qazaqstan men BAÁ arasynda syndarly saıası dıalog ornatylǵanyn jáne ekijaqty yntymaqtastyqtyń joǵary deńgeıine qol jetkizilgenin atap ótti. Úkimet basshysynyń aıtýynsha, oǵan eń joǵary deńgeıdegi turaqty baılanystar yqpal etip otyr.

«Birikken Arab Ámirlikteri – Qazaqstannyń óńirdegi negizgi saýda-ekonomıkalyq seriktesi. Ámirlikter bizdiń elmen taýar aınalymy boıynsha arab elderi arasynda kósh bastap tur», - dedi Premer-Mınıstr.

Máselen, 2021 jyldyń qorytyndysy boıynsha ózara taýar aınalymy $709 mln boldy, bul kórsetkish ótken jylmen salystyrǵanda 50%-ǵa jýyq artty.

«Bul – jaqsy nátıje, alaıda biz ózara saýda nomenklatýrasyn odan ári keńeıtý boıynsha birlesip kúsh-jiger jumsaı alamyz», - dedi Álıhan Smaıylov.

Sonymen qatar Úkimet basshysy sońǵy jyldary BAÁ-den Qazaqstanǵa ınvestıtsııalardyń júıeli túrde ósip kele jatqanyn atap ótti. Ótken jyldyń qorytyndysy boıynsha bul kórsetkish 43%-ǵa ósip, $250 mln-ǵa jetti. Bul trend bıyl da saqtalyp otyr.

«Biz taý-ken metallýrgııa kesheni, aýyl sharýashylyǵy, munaı hımııasy, energetıka, geologııa sııaqty salalarda ınvestıtsııalyq yntymaqtastyqty arttyrý jáne tereńdetý úshin aıtarlyqtaı áleýetti baıqap otyrmyz. Atalǵan salalar bizdiń strategııalyq maqsattarymyzǵa saı keledi», - dedi Álıhan Smaıylov.

Osyǵan baılanysty sheıh Mansýr ben Zaıd Ál Nahaıanǵa jalpy somasy $6,5 mlrd-tan asatyn perspektıvalyq ınvestıtsııalyq jobalardyń tizimi qaraýǵa berildi. Bul rette ónerkásiptegi, energetıkadaǵy, bank sektoryndaǵy jáne aýyl sharýashylyǵyndaǵy, onyń ishinde birlesken venchýrlik qor qurý, qant zaýytyn salý jáne kaltsıı qosylǵan soda óndirisin iske qosý boıynsha eń iri bes jobaǵa basa nazar aýdaryldy.

«Qazaqstan Úkimeti BAÁ-men barlyq baǵyttar boıynsha ózara tıimdi yntymaqtastyqty tereńdetýge jáne nyǵaıtýǵa nıetti», - dep túıindedi Álıhan Smaıylov.

Kezdesý qorytyndysy boıynsha ekologııa, saýda, mádenıet jáne bilim berý salalarynda birqatar ekijaqty vedomstvoaralyq qujattarǵa qol qoıyldy.

Óz kezeginde sheıh Mansýr ben Zaıd Ál Nahaıan bul sapardyń eki el arasyndaǵy yntymaqtastyqty nyǵaıtý úshin mańyzy erekshe ekenin atap kórsetti.

Ol Qazaqstannyń BAÁ-niń Ortalyq Azııa óńirindegi jetekshi áriptesteriniń biri ekenin aıtty. Sondaı-aq bank salasy men aýyl sharýashylyǵynda, onyń ishinde qant jáne sút ónimderin óndirý boıynsha birlesken jobalardy iske asyrýǵa múddeli ekenin bildirdi.

Sheıh Mansýr ben Zaıd Ál Nahaıan Qazaqstan Úkimeti basshysynyń osy sapary eki el arasyndaǵy qatynastardy joǵary deńgeıge kóterýge yqpal etetinine senim bildirdi.

Foto: primeminister.kz