Qazaqstan azyq-túlik ónimderi ımportyn qysqartady
18:39, 17 Mamyr 2014
ASTANA. QazAqparat - Qazaqstan azyq-túlik ónimderi ımportyn qysqartady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Aýyl sharýashylyǵy mınıstri Asyljan Mamytbekov málim etti.
Onyń atap ótýinshe, buǵan búgin Úkimette maquldanǵan 2020 jylǵa deıingi azyq-túlik óndirisin damytý sharalary óz septigin tıgizbek.
«Baǵdarlamada biz óńdeý ónerkásibin damytýǵa bar kúsh-jigerimizdi shoǵyrlandyrdyq. 2020 jylǵa qaraı birqatar ónim túrleriniń ımport kólemi qysqaratyndyǵyn kútýdemiz», dedi ol.
A.Mamytbekovtiń atap ótýinshe, qazirgi tańda elimizde azyq-túlik ónimderiniń negizgi ımporttalatyn túrleri jalpy ımport kóleminiń 60 paıyzynan asyp jyǵylady. Máselen, jalpy ımport kóleminiń 18 paıyzyn kondıterlik ónimder qurasa, sút ónimderi - 13, qant - 8, qus eti - 6, jemis-jıdek qalbyry - 6, shaı - 5, ósimdik maıy men shujyq ónimderi - 3 paıyzǵa teń.