Qazaqstan azyq-túlik qaýipsizdigi reıtınginde 113 eldiń arasynda 32-shi orynda

ASTANA. QazAqparat – Pandemııa saldary men kórshi elderdegi kúrdeli geosaıası jaǵdaıǵa qaramastan, Qazaqstanda azyq-túlik qaýipsizdigi boıynsha oń dınamıka saqtalyp otyr. Astana halyqaralyq forýmy aıasynda paneldik sessııaǵa qatysqan Aýyl sharýashylyǵy mınıstri Erbol Qarashókeev osylaı málim etti, dep habarlaıdy QazAqparat tilshisi.

«Pandemııa saldary men kórshi elderdegi kúrdeli geosaıası jaǵdaıǵa qaramastan, Qazaqstanda azyq-túlik qaýipsizdigi boıynsha oń dınamıka saqtalyp otyr. Ótken jyly álemdik «Global Food Security» ındeksinde elimiz 113 memlekettiń arasynda 32-orynǵa turaqtady. Bul óte jaqsy kórsetkish», - dep málim etti Erbol Qarashókeev.

Mınıstr baıandaǵandaı, kórsetkishterdiń jaqsarýyna Úkimet tarapynan jasalyp jatqan qoldaý sharalary oń áser etip otyr.

«Jalpy, bıyl Qazaqstandaǵy agroónerkásip keshenin qoldaýǵa 1 mlrd dollar kóleminde qarjy qarastyrylǵan. Buǵan qosa, memleket aldaǵy birneshe jylda iri jobalarǵa 1 mlrd dollarǵa jýyq qarajat bólýdi josparlap otyr», - dedi Erbol Qarashókeev.

Onyń aıtýynsha, byltyr aýyl sharýashylyǵy salasynyń negizgi kapıtalyna 2 mlrd dollar ınvestıtsııa tartylǵan. Sondaı-aq, azyq-túlik taýarlarynyń óndirisi 4% artyp, 6,5 mlrd dollarǵa jetti.