Qazaqstan Azov teńizindegi shıelenisti odan ary ýshyqtyrmaýǵa shaqyrdy
«Qazaqstan Azov teńizinde oryn alǵan jaıtqa baılanysty alańdaýshylyq tanytady. Kerch buǵazy arqyly azamattyq kemelerdiń ótýiniń qaıta jańǵyrýyn qoldaımyz. Biz taraptardy barynsha jaýapkershilik tanytyp, jaǵdaıdyń odan ary ýshyǵýyna jol bermeýge shaqyramyz. Eń aldymen mundaı jaıttardyń aldyn alý jáne retteý tetikteri qajet», - dedi Aıbek Smadııarov.
Sonymen qatar SІM ókili eki taraptyń arasynda senimdi qalpyna keltirý qajettigine basa nazar aýdardy.
«BUU Qaýipsizdik keńesi búgin keńester barysynda oryn alǵan jaıtty talqylamaq. Qazaqstan óz kezeginde Azov teńizindegi jaǵdaıdy odan ary ýshyqtyrmaýǵa baǵyttalǵan usynystardy qoldaıtyn bolady»,- dedi Aıbek Smadııarov.
Buǵan deıin habarlaǵanymyzdaı, Ýkraına men Reseıdiń ótinishimen BUU Qaýipsizdik keńesiniń shuǵyl otyrysy ótedi.
Eske salsaq, Reseı shekarashylary Qara teńizde Ýkraına áskerı-teńiz kúshteriniń «Berdıansk», «Nıkopol» jáne «ıAny Kapý» kemelerin ustady. RF Federaldyq Qaýipsizdik qyzmetiniń qoǵammen baılanys ortalyǵy málimetinshe, ýkraınalyq kemeler Reseıdiń terrıtorıaldyq teńiz aýmaǵynda «zańsyz áreket jasamaq bolǵan» jáne qozǵalysty dereý toqtatý týraly talaptardy oryndamaǵan.
Al Ýkrınform aqparatyna sáıkes reseılik áskerıler Kerch buǵazynda Ýkraına Áskerı teńiz kúshterine tıesili úsh kemeniń qozǵalysyna tosqaýyl qoıyp, olarǵa oq jaýdyrǵan.