Qazaqstan Ázerbaıjannan jemis-jıdek ákelýge qatysty zańdy maquldady

ASTANA. QazAqparat - Senat «Qazaqstan Úkimeti men Ázerbaıjan Úkimeti arasyndaǵy Ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkatsııalaý týraly» Zańdy maquldady, dep habarlaıdy QazAqparat tilshisi.

Zańnyń negizgi maqsaty - karantınge jatqyzylǵan ónimdi elge ákelý kezinde fıtosanıtarııalyq qaýipsizdikti qamtamasyz etý jónindegi is-sharalar men ózara is-qımyldy nyǵaıtý.

«2010 jylǵy 29 sáýirden bastap Qazaqstan Halyqaralyq ósimdikter karantıni jáne olardy qorǵaý jónindegi konventsııanyń (HÓKQK) múshesi sanalady. Qazaqstan Respýblıkasynyń qabyldanǵan halyqaralyq mindettemeleri fıtosanıtarııalyq is-sharalar boıynsha halyqaralyq standarttardyń saqtalýyn jáne qoldanylýyn kózdeıdi. Osy talaptardy saqtaý eki el aýmaǵynda tıisti fıtosanıtarııalyq jaǵdaıdy qamtamasyz etedi», - dedi QR Aýyl sharýashylyǵy vıtse-mınıstri Ábilhaıyr Tamabek

Kelisimdi ratıfıkatsııalaý boıynsha zań jobasyn qabyldaý mynalardy qamtamasyz etedi:

- karantınge jatqyzylǵan ónimniń ornyn aýystyrý kezinde eki eldiń fıtosanıtarııalyq qaýipsizdigin qamtamasyz etý maqsatynda odan ári yntymaqtastyqty damytý;

- eki el aýmaǵynyń fıtosanıtarııalyq jaı-kúıi týraly ózara habardar etý;

- zertteý jáne dıagnostıkalaý tájirıbesimen almasý bóliginde ósimdikter karantıni jónindegi ǵylymı uıymdar arasyndaǵy yntymaqtastyqty júzege asyrý.

Onyń aıtýynsha, Qazaqstannan Ázerbaıjanǵa negizinen dándi daqyldar eksporttalyp jatyr. Óz kezeginde Ázerbaıjannan Qazaqstan aýmaǵyna jylyna shamamen 15 myń tonnaǵa jýyq jemis-kókónis ónimderi keledi. Ázerbaıjannan keletin ımport negizinen alma, almurt, anar, júzim, jańǵaq jáne tsıtrýs jemisteri túrlerinen turady.