Qazaqstan Ázerbaıjanǵa astyq eksportyn arttyrady

<p>ASTANA. KAZINFORM &ndash; Qazaqstandyq &laquo;Aq Bıdaı-termınal&raquo; AQ men Ázerbaıjannyń iri holdıngi NB Holding birlesken baqylaýdaǵy &laquo;Baký astyq termınaly&raquo; JShS kásipornyn odan ári damytý máselelerin talqylady.</p>

«Aq Bıdaı-Termınal» AQ basqarma tóraǵasy Nurlan Erqojauly Baký qalasyna jumys sapary aıasynda NB Holding basshylyǵymen kezdesý ótkizdi. Sonyń barysynda teńiz arqyly Ázerbaıjanǵa astyqty jetkizýdi qamtamasyz etý jaıy, un ónimderin ótkizýdiń eksporttyq baǵytynda kásiporynnyń áleýetin damytý máseleleri talqylandy.

Kezdesýden keıin taraptar birlese baqylanatyn kásiporyn – «Baký astyq termınaly» JShS-ǵa bardy. Onda NB Holding basshylyǵymen qol jetkizilgen kelisimderdi is júzinde júzege asyrý josparlary sóz etildi. Birlesken is-sharalar josparyna kásiporyndy astyqpen úzdiksiz qamtamasyz etý, joǵary sapaly un ónimderin shyǵarý jáne undy kórshiles naryqtarǵa satý kiredi.

«Qarasha aıynyń sońyna deıin qazaqstandyq tarap Baký astyq termınalynyń dıirmen keshenine óńdeýge joǵary sanatty bıdaıdyń 6 myń tonna bastapqy partııasyn jiberýdi kózdep otyr. Aldaǵy ýaqytta Taıaý Shyǵys elderine aı saıyn 3 myń tonnaǵa jýyq un jóneltý josparlanǵan», - dedi Nurlan Erqojauly.

Aıta keteıik, «Baký astyq termınaly» kásiporny óziniń dıirmen kesheninde un óndiretin ámbebap astyq termınaly.

Osyǵan deıin elimizde kóktemgi tasqynǵa qaramastan 26 mıllıon tonnadan astam astyq jınalǵanyn habarlaǵan edik.