Qazaqstan, Ázerbaıjan jáne Túrkııa kólik-logıstıka máselelerin talqylady

BAKÝ. QazAqparat - QR Premer-Mınıstriniń orynbasary – Syrtqy ister mınıstri Muhtar Tileýberdi jáne QR Indýstrııa jáne ınfraqurylymdyq damý mınıstri Qaıyrbek Óskenbaev Qazaqstan, Ázerbaıjan jáne Túrkııa Syrtqy ister mınıstrleri men kólik mınıstrleriniń úshjaqty kezdesýine qatysty. Bul týraly QazAqparat SІM silteme jasap habarlaıdy.

Taraptar kólik-logıstıka salasyndaǵy, óńirlik jáne halyqaralyq kún tártibindegi yntymaqtastyqtyń ózekti máseleleriniń keń aýqymy boıynsha «saǵattardy teńestirdi». Aýqymdy geosaıası transformatsııa jaǵdaıynda saýda-ekonomıkalyq, tranzıt-kóliktik jáne energetıkalyq yntymaqtastyqty keńeıtýdiń birlesken tásilderi qarastyryldy.

QR SІM basshysy Ázerbaıjan men Túrkııa Qazaqstan úshin óńirdegi negizgi saıası jáne ekonomıkalyq áriptester ekenin atap ótti.

«Koronavırýs pandemııasy kezeńinde ózara saýdadaǵy ekonomıkalyq belsendiliktiń báseńdeýine qaramastan, qazirgi ýaqytta burynǵy qalpyna keltirý jáne ózara tıimdi yntymaqtastyqtyń jańa kórsetkishterine qol jetkizý úshin eleýli áleýetimiz bar», - dep tolyqtyrdy M.Tileýberdi.

Kezdesýge qatysýshylar óńirdegi temirjol jelileri men munaı qubyrlary sııaqty birlesken jobalardy iske asyrýdyń jaı-kúıi men perspektıvalaryn talqylady. Eýropalyq baǵyttaǵy múmkindikterdiń shektelýi jaǵdaıynda Kaspıı teńizi - Qara teńiz jelisi boıynsha marshrýttar erekshe mánge ıe bolady. Mınıstrler kólik kólemin ulǵaıtý porttardaǵy tehnıkalyq jáne tarıftik sharttardy ýaqtyly jańǵyrtýdy talap etedi, bul barlyq saýda-ekonomıkalyq yntymaqtastyqtyń draıveri bolady degen pikirge keldi.

Osy kezdesýge qatysýshy elderdiń tranzıttik áleýetin arttyrý úshin asa mańyzdy maǵynasy bar Transkaspıı halyqaralyq kólik baǵdaryn (THKB) damytý máselesine erekshe nazar aýdaryldy. Qatysýshylar kólik áleýetin damytý jónindegi negizgi baǵyttarǵa degen kózqarastardyń birtutastyǵyn qanaǵattanýshylyqpen atap ótip, úkimettik deńgeıde tikeleı baılanystardy qarqyndatýǵa ózara múddelilikti rastady.

Taraptar kelesi kezdesýdi osy formatta Qazaqstanda aǵymdaǵy jylǵy kúzde ótkizýge ýaǵdalasty.