Qazaqstan iri tranzıt aýmaǵy retinde úlken ról atqarady - Prezıdent
Memleket basshysy búgingi aıtýly oqıǵa ornyqty damýǵa ortaq umtylys tarıhynyń jańa paraǵyn ashqanyn atap ótti.
– Strategııalyq seriktestik týraly kelisimge qol qoıý – Ortalyq Azııa men Ońtústik Kavkaz óńirleriniń úshjaqty yntymaqtastyǵyn damytýdaǵy mańyzdy kezeń. Qujat elderimizdiń energetıkalyq júıelerin ıntegratsııalaý, sondaı-aq Eýropa elderi men basqa da naryqtarǵa ekologııalyq taza energııany jetkizetin senimdi dálizderdi qalyptastyrý úshin jańa múmkindikterge jol ashady. Munda Qazaqstan iri tranzıt aýmaǵy retinde úlken ról atqarady. Atalǵan kelisimniń naqty nátıjeleri úsh eldiń ekonomıkalaryn biriktirip, Orta dálizdi «jasyl kópir» retinde damytýǵa yqpal etedi. Bul mańyzdy saladaǵy tyǵyz yntymaqtastyq memleketter arasyndaǵy tájirıbe men ozyq tehnologııalardy almasýǵa serpin beredi, sondaı-aq energetıkalyq qaýipsizdigimizdi nyǵaıtýǵa septigin tıgizedi, – dedi Prezıdent.
Qasym-Jomart Toqaevtyń aıtýynsha, kómirtegi beıtaraptyǵyna jetýdi kózdeıtin Qazaqstan úshin jasyl energetıka mańyzdy baǵyt sanalady.
– Biz qazba baılyqtarǵa táýeldilikti azaıtýǵa belsendi túrde kiristik. Tehnologııalyq ınnovatsııalardy damytyp, ekologııalyq ornyqty órkendeýge demeý bolatyn ınfraqurylym qurýǵa bet burdyq. Qazaqstan sheteldik seriktestermen jalpy qýaty 43 GVt bolatyn «jasyl» jobalardy júzege asyrý jóninde ýaǵdalastyqqa qol jetkizdi, – dedi Memleket basshysy.
Ázerbaıjan Prezıdenti Ilham Álıev búgingi kelisimder úsh memleket arasyndaǵy baýyrlastyq qatynastar men strategııalyq seriktestikti jańa deńgeıge shyǵaratynyn atap ótti.
– Ortalyq Azııa men Kavkaz óńiri kóptegen másele boıynsha, sonyń ishinde «jasyl» energııany damytý salasynda birlesip áreket etedi. Biz qaıta jańǵyrtylatyn energııa kózderi baǵytynda Qazaqstan men Ózbekstannyń aýqymdy josparlary men qol jetkizgen jetistikteri jaıynda jaqsy bilemiz, – dedi Ázerbaıjan Prezıdenti.
Ózbekstan Prezıdentiniń pikirinshe, búgingi kelisim ekonomıkalyq maqsatty ǵana kózdemeıdi, bul – bolashaqqa qosylǵan ortaq úles.
– Atalǵan jobanyń ekologııalyq mańyzyn erekshe atap ótkim keledi. Jelden, kúnnen alynatyn qýat klımattyń jumsarýyna áser etedi. Osy arqyly biz Parıj kelisimi aıasynda klımatty qorǵaý jóninde birlesken kúsh-jigerge qoldaý bildirip, ornyqty damý maqsattaryna qol jetkizýge atsalysamyz, – dedi Shavkat Mırzıeev.
Іs-sharada memleketter basshylarynyń qatysýymen Qazaqstannyń Energetıka mınıstri Almasadam Sátqalıev, Ázerbaıjannyń Energetıka mınıstri Parvız Shahbazov, Ózbekstannyń Energetıka mınıstri Jýrabek Mırzamahmýdov jáne Saýd Arabııasynyń Energetıka mınıstri Ábdel Azız ben Salman Ál Saýd Jasyl energııany damytý jáne berý salasyndaǵy yntymaqtastyq týraly atqarýshy baǵdarlamaǵa qol qoıdy.