Qazaqstan, Ázerbaıjan jáne Ózbekstan energetıka salasyndaǵy yntymaqtastyqty keńeıtýde
Qazaqstan tarapynan kezdesýge Energetıka mınıstri Almasadam Sátqalıev pen Qazaqstannyń Ázerbaıjandaǵy Elshisi Álim Baıel qatysty. Basqosý barysynda taraptar Ázerbaıjan aýmaǵy arqyly Qazaqstan men Ózbekstannan Eýropaǵa elektr energııasyn eksporttaý perspektıvalaryn talqylady, sondaı-aq jasyl energetıka salasyndaǵy jobalardy damytý jóninde pikir almasty. Atap aıtqanda, úsh eldiń jańartylatyn energııany damytý jáne eksporttaý salasyndaǵy memlekettik saıasaty Ázerbaıjanǵa Ortalyq Azııadan Eýropaǵa elektr energııasyn jetkizýde baılanystyrýshy kópir rólin atqarýǵa múmkindik beretinine nazar aýdaryldy.
Búginde Ázerbaıjan Grýzııa, Rýmynııa jáne Vengrııamen birlesip, Kaspıı – Qara teńiz – Eýropa eksport dálizin qurý boıynsha jumys júrgizip jatyr. Onyń aıasynda 4 GVt elektr energııasyn eksporttaý josparlanýda. Nahchyvan – Túrkııa – Eýropa baǵyty boıynsha da 1 GVt-tan astam jasyl energııany jetkizý josparǵa engizilgen. Qazaqstan men Ózbekstannyń osy dálizderge qol jetkizýi elektr energııasy naryqtaryn odan ári damytýǵa, jasyl sýtegi men ammıak óndirý jáne jetkizý salasyndaǵy yntymaqtastyqty nyǵaıtýǵa, energetıkalyq qaýipsizdikti nyǵaıtýǵa jáne Orta dáliz aıasynda jasyl jobalardy damytýǵa oń yqpal etedi.
Kezdesýde Qazaqstan men Ózbekstannyń energetıkalyq júıelerin Ázerbaıjannyń energetıkalyq júıesimen biriktirgennen keıin Kaspıı teńiziniń túbimen joǵary voltty jelilerdi tartý múmkindikteri týraly pikir almasý boldy.
Kelissózder nátıjesinde jobanyń tehnıkalyq-ekonomıkalyq negizdemesin daıyndaý jáne elektr energııasyn eksporttaý boıynsha birlesken kásiporyn qurý týraly ýaǵdalastyqqa qol jetkizilip, tıisti birlesken kommıýnıkege qol qoıyldy.
Aıta keteıik, bıyl Qazaqstan men Ázerbaıjan Kaspıı teńiziniń túbimen aımaqtaǵy ınternet-trafıkti ártaraptandyrýǵa múmkindik beretin talshyqty-optıkalyq baılanys jelisin tartý boıynsha birlesken jobany júzege asyrýdy bastaǵan bolatyn.