Qazaqstan azamaty Majarstanda zańsyz mıgranttardy tasymaldaǵany úshin qamaldy

ASTANA. QazAqparat – Majarstanda joǵalyp ketti degen Qazaqstan azamaty qamaýǵa alyndy. Oǵan mıgranttardy zańsyz tasymaldady degen aıyp taǵyldy, dep habarlaıdy QazAqparat tilshisi.

Bul týraly QR Syrtqy ister mınıstrliginiń resmı ókili Aıbek Smadııarov aıtyp berdi.

Buǵan deıin buqaralyq aqparat quraldarynda 27 jastaǵy qazaqstandyq Qanatbek Ótebektiń Majarstanda joǵalyp ketkeni habarlanǵan bolatyn.

«Bul jaǵdaıdy anyqtadyq. Ol Majarstanda qamaýǵa alyndy. Polıtsııa ony mıgranttardy zańsyz tasymaldady dep aıyptap otyr. Ol osydan 1,5 aı buryn Qazaqstanda Shengen vızasyn alyp, Eýropa elderiniń birine ushyp kelgen. Bir aptadan keıin Shyǵys Eýropa aýmaǵynda, sonyń ishinde Serbııa, Majarstan, Chehııada bolǵan jáne osy baǵyt boıynsha zańsyz mıgranttardy tasymaldaǵan. Ol áý basta-aq qandaı jumysqa bara jatqanyn bildi. Bul zańdaǵy aýyr bap, óte salmaqty aıyp taǵylyp otyr», - dedi Aıbek Smadııarov jýrnalısterge arnalǵan brıfıngte.

Qazaqstandyqtyń tutqyndalýyna baılanysty Syrtqy ister mınıstrligi Eýropaǵa jumysqa barýdy josparlap otyrǵan qazaqstandyqtarǵa belgili bir eldiń zańdary men erejelerin muqııat zerdeleýdi eskertti.

Resmı ókildiń aıtýynsha, qazir Q. Ótebekke advokat tabylǵan.

«Onyń týystary barlyq oqıǵalar týraly biledi. Meniń oıymsha, budan ári ne bolatynyn tergeý qyzmeti anyqtaıdy», - dedi A.Smadııarov.