«Qazaqstan azamaty» degen uǵym jalpyulttyq biregeıliktiń ózegi bolýy qajet

ASTANA. QazAqparat – «Qazaqstan azamaty» degen uǵym jalpyulttyq biregeıliktiń ózegi bolýy qajet. Búgin prezıdenttikke Qasym-Jomart Toqaevtyń kandıdatýrasyn qoldaý jónindegi halyqtyq koalıtsııanyń forýmynda sóz sóılegen QR Prezıdenti osylaı aıtty, dep habarlaıdy QazAqparat tilshisi.

«Rýhanı úndestik – birliktiń bastaýy. Tól tarıhymyz, ana tilimiz ben ata dinimiz – eldi biriktiretin biregeı qundylyqtar. Ony daý-damaıǵa aınaldyrýǵa bolmaıdy. Jurtty adastyryp, teris jolǵa salýdan saqtanǵan jón. Qazaqstanda túrli etnos ókilderi ómir súrip jatyr. Olardyń maqsaty – bir, bolashaqqa degen kózqarasy – ortaq. Bárimiz – bir eldiń azamattarymyz», - dedi Memleket basshysy halyqtyq koalıtsııanyń forýmynda.

Prezıdent «Áralýandyq arqyly – birlikke» qaǵıdaty eshqashan ózektiligin joǵaltpaıtynyn aıtty.

«Biz etnosaralyq tatýlyqty saqtaı bilýimiz kerek. «Qazaqstan azamaty» degen uǵym jalpyulttyq biregeıliktiń ózegi bolýy qajet. Sonda birtutas ult retinde keleshekke senimmen qadam basamyz», - dedi Qasym-Jomart Toqaev.