Qazaqstan azamattarynyń shetelderdegi terrorlyq áreketterge qatysqan 100-den astam oqıǵasy tirkelgen

ASTANA. QazAqparat - 2014 jyldyń 4 aıynda elimizde terrorızmge qatysty 57 qylmystyq is qozǵaldy. Olar negizinen dinı alaýyzdyqty qozdyrý, terrorızmge nasıhattaý jáne terrorıstik aktiler jasaýǵa jarııa shaqyrý faktileri, terrorıstik toptar qurý, oǵan basshylyq jasaý jáne onyń qyzmetine qatysý, jasaqtaý, terrorıstik nemese ekstremıstik áreketter úshin qarýly adamdar tobyn daıyndaý nemese uıymdastyrý, terrorızmdi nemese ekstremızmdi qarjylandyrý faktileri faktilerin qamtyǵan.

Bul týraly búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.

QR Bas prokýrorynyń orynbasary Andreı Kravchenkonyń aıtýynsha, sońǵy jyldary Qazaqstanda terrorızmniń 10 aktisi oryn alyp, saldarynan quqyq qorǵaý organdarynyń 17 qyzmetkeri men 4 beıbit turǵyn qaza bolǵan. «Sońǵy jyldary Qazaqstan azamattarynyń shetelderde terrorlyq áreketterge qatysýynyń 100-den astam oqıǵasy tirkeldi. Budan bólek, ekstremıstik jáne terrorlyq qurylymdar óz áreketin Qazaqstan aýmaǵynda júzege asyrýǵa da tyrysýda. Osyǵan oraı, tek sońǵy 5 jylda Qazaqstanda ekstremıstik jáne terrorlyq uıymdarǵa qatysy bar 70-ten astam sheteldik ustaldy», - dedi A. Kravchenko.

Onyń aıtýynsha, 2014 jyldyń 4 aıynda dinı alaýyzdyqty qozdyrý, terrorızmdi ýaǵyzdaý, terrorlyq toptar qurý men onyń jumysyna qatysý, ekstremızm men terrorızmdi qarjylandyrý sekildi faktilermen 57 qylmystyq is qozǵaldy. Osyǵan oraı, jyl basynan beri atalǵan ister boıynsha 20 adam sottalǵan. «Budan bólek, 2009 jyldan beri ekstremıstik dep tanylǵan jáne elge ákelýge tyıym salynǵan myńǵa jýyq ádebıet tárkilendi. 2004 jyldan bastap Qazaqstanda 5 uıym ekstremıstik dep tanylyp, olardyń jumysyna tyıym salynǵan», - dedi Bas prokýror orynbasary.

Eske sala keteıik, búgin Májiliste «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.