Qazaqstan azamattarynyń elektrondyq ótinimderi jedel qaralady - QR Bas prokýratýrasy

ASTANA. 28 qarasha. QazAqparat - Bas prokýratýra Qazaqstan azamattaryn elektrondyq memlekettik qyzmetterdi paıdalaný aıtarlyqtaı yńǵaıly ekenin habarlap otyr. Sondaı-aq azamattardyń Internet arqyly jibergen ótinimderi jedel qaralady eken.

Bas prokýratýranyń Ótinishterdi qaraý jáne is qaǵazdaryn júrgizý týraly zańdardyń qoldanylýyn qadaǵalaý basqarmasynyń bastyǵy Lázzat Janysovanyń aıtýynsha, búginde www.115.kz veb-portaly jumys isteıdi jáne osy jeli arqyly túrli máseleler boıynsha el azamattarynyń ótinimderi qabyldanady. Qyzmetti paıdalaný úshin HQKO-da beriletin elektrondyq sandyq qoltańba qajettilik etedi. Saıtta tirkelgennen keıin azamattar óziniń ótinimderin jibere alady.

«Bul óz kezeginde azamattarǵa jáne bizge de qolaıly. Osyndaı ótinimder prokýrorǵa jyldam jetedi, sonymen qatar jaýap qaıtarýdyń úderisi de jyldamdaıdy»,-deıdi L. Janysova.

Budan bólek, Internetke shyǵý múkindigi bolmasa, 115 aqysyz nómiri arqyly habarlasýǵa bolady. Atap aıtqanda, osy jelimen túsken málimet te  arnaıy derekter bankinde tirkeledi.

Munymen qosa qazaqstandyqtarǵa Bas prokýratýranyń basshylyǵyna onlaın-rejımdegi beıne konferentsııalyq baılanys arqyly shyǵýǵa bolady eken. Ol úshin azamat jergilikti prokýratýra organyna baryp, osyndaı baılanysqa shyǵa alady.

Taratylǵan málimetterge qaraǵanda, sońǵy 5 jyldyń ishinde prokýratýra organdaryna kelip túsken ótinishter sany 25 paıyzǵa ósken. Aǵymdaǵy jyldyń 10 aıynda olar 217 myńǵa jetken. Sonyń ishinde Bas prokýratýraǵa 28 111 ótinish nemese 13 paıyzy kelip túsken.

Olardyń 41 paıyzy qylmystyq qýdalaý organdarynyń aktileri men áreketterine qatysty, 29 paıyzy memlekettik organdar men mekemelerdiń aktileri men áreketterine qatysty bolǵan. Sot aktileriniń zańdylyǵy jáne olardy oryndaýǵa qatysty ótinishterdiń úlesi 22 paıyzdy quraǵan.