Qazaqstan azamattaryn jumystan bosatý derekteri mindetti túrde tekseriledi - Tamara Dúısenova

ASTANA. QazAqparat – Qazaqstan azamattaryn jumyspen qamtýǵa basymdyq beriledi. Bul týraly Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Shartqa sáıkes elimizdiń azamattary EAEO quramyndaǵy memleketterde ruqsatsyz jumys isteı alady. Sol sııaqty bul elderdiń azamattary bizge de jumysqa kele alady. Eger kelgen azamattar bizdiń eńbek salasyndaǵy qaýipsizdigimizge qaýip tóndiretin bolsa, onda tıisti salalarǵa keletin adamdarǵa shekteý qoıa alamyz», - dedi T. Dúısenova Parlament Májilisinde tilshiler suraǵyna jaýap bere otyryp.

Osy oraıda ol birinshi kezekte Qazaqstan azamattarynyń jumyspen qamtylýyna basymdyq beriletinin aıtty.

Sonymen qatar mınıstr elimizdegi kásiporyndar sheteldikterdi jumysqa ornalastyrý úshin Qazaqstan azamattaryn jumystan bosatsa, onda mundaı derekter mindetti túrde tekseriletinin jetkizdi.

«Mundaı naqty derekter bolsa, onda eńbek ınspektorlaryn tekserýge jiberemiz», - dedi vedomstvo basshysy.

Bul turǵyda eńbek zańnamasyna qaıshy áreketter anyqtalsa, onda mınıstrliktiń baılanys jelileri arqyly shaǵymdanýǵa bolady.

Budan buryn habarlanǵandaı, Ulttyq ekonomıka mınıstri Álibek Qýantyrov elimizge aǵylǵan kórshi elderdiń azamattary qaı salalarda jumys isteı alatyndyǵyn aıtty.

Premer-Mınıstr Álıhan Smaıylov kórshiles elden kelgen mıgranttar belgilengen zańnama aıasynda ǵana eńbek ete alatynyn málim etti .

Foto: ortcom.kz