Qazaqstan azamattaryn Sýdannan evakýatsııalaý jalǵasyp jatyr - SІM

ADDIS-ABEBA. QazAqparat – Búgingi tańda Qazaqstannyń birqatar azamaty qaqtyǵys aımaǵynan evakýatsııalandy. Efıopııa men Saýd Arabııasy Koroldiginiń aýmaǵy arqyly evakýatsııalaý jumystary jalǵasyp jatyr, dep habarlaıdy QazAqparat Syrtqy ister mınıstrliginiń resmı saıtyna silteme jasap.

Sýdandaǵy soǵys qımyldary bastalǵan sátten bastap Qazaqstan Respýblıkasynyń Efıopııadaǵy Elshiligi qazaqstandyq azamattardy qaqtyǵys aımaǵynan evakýatsııalaý máselesin barynsha pysyqtaýǵa kiristi.

Efıopııada tirkelgen birqatar elshilikter men halyqaralyq uıymdardyń ókilderimen kezdesýler ótkizilip, olarǵa Qazaqstan Respýblıkasynyń azamattaryn Sýdannan evakýatsııalaýǵa kómektesý úshin resmı ótinishter jiberildi.

Búgingi tańda Qazaqstannyń birqatar azamaty qaqtyǵys aımaǵynan evakýatsııalandy. Efıopııa men Saýd Arabııasy Koroldiginiń aýmaǵy arqyly evakýatsııalaý jumystary jalǵasyp jatyr.

Efıopııadaǵy QR Elshiligi azamattarymyzdy Sýdannan kelisilgen jáne qaýipsizdikpen shyǵarý úshin Mysyrdaǵy jáne Saýd Arabııasyndaǵy QR dıplomatııalyq ókildikterimen tyǵyz baılanysta.

QR azamattarynyń naqty sanyn anyqtaý jáne olarǵa Sýdannan evakýatsııalaýǵa járdem kórsetý úshin Elshilik janynan jedel jeli ashyldy: [phone] (WhatsApp), [e-mail], [e-mail].

Elshilik Efıopııa Syrtqy ister mınıstrligine, BUU-nyń Sýdan men Efıopııadaǵy bólimshelerine, sondaı-aq Túrkııa, Reseı jáne Japonııa elshilikterine Qazaqstan azamattaryn evakýatsııalaýǵa belsendi kómek kórsetkeni úshin alǵysyn bildiredi.

15 sáýirde Sýdannyń Ulttyq qorǵanys kúshteri men Jedel áreket etý kúshteri arasynda qarýly qaqtyǵys bastalǵan bolatyn. Qazir Hartým qalasynda jáne eldiń basqa aımaqtarynda soǵys qımyldary júrip jatyr. Qaqtyǵys saldarynan qaza tapqan beıbit turǵyndar sany 459 adamǵa jetti, 4 075 adam jaraqat aldy.