Qazaqstan azamattary Omanǵa vızasyz bara alady

NUR-SULTAN. QazAqparat - Oman Sultandyǵynyń úkimeti álemniń 103 memleketiniń, sonyń ishinde Qazaqstan Respýblıkasynyń azamattary úshin 10 kúndik vızasyz tártip engizdi. QazAqparat bul týraly QR Syrtqy ister mınıstrligine silteme jasap habarlaıdy.

Talaptarǵa sáıkes Qazaqstan azamattary Omanǵa kirý úshin shekaradan ótý kezinde qonaqúıdiń brondalǵanyn, sapar merzimine medıtsınalyq saqtandyrýdyń bar ekendigin rastaýy qajet. Sondaı-aq qaıtý áýe bıletin, AQSh, Aýstralııa, Kanada, Japonııa, Ulybrıtanııa nemese Shengen aımaǵynyń qoldanystaǵy vızasy bar pasportty kórsetýleri tıis.

«Elde vızasyz bolýdy uzartý qarastyrylmaǵanyn atap ótken jón. Bul erejeni buzý árbir merzimi ótken kúnge 10 omandyq rıal (shamamen 26 AQSh dollar) mólsherinde aqshalaı aıyppul tóleýge ákelip soǵady.

Sonymen qatar, elde COVID-19 pandemııasynyń ary qaraı taralýyna jol bermeý maqsatynda 2020 jyldyń 21 jeltoqsanynda Oman Úkimeti 22 jeltoqsan kúni saǵat 01.00-den bastap 29 jeltoqsan kúni saǵat 00.59-ge deıin barlyq memlekettik shekaralardy (áýe, jer jáne teńiz) jabý týraly sheshim qabyldaǵanyn eskertemiz», - dedi mınıstrlikten.