Qazaqstan azamatshasy A.Kúshenova AQSh-ta qamaýǵa alyndy - QR SІM túsiniktemesi

ASTANA. QazAqparat - AQSh-ta Qazaqstan azamatshasy A.Kúshenova qamaýǵa alyndy. QR Syrtqy ister mınıstrligi vedomstvonyń baspasóz hatshysy Nurjan Aıtmahanovtyń qamaýǵa alynǵan A.Kúshenovaǵa qatysty bergen túsiniktemesin taratty.

Asııa Kúshenova Florıda shtatynda (AQSh) Leon graftyǵynda 5 tamyz kúni qamaýǵa alynǵan. Florıda shtatynyń polıtseıleri bergen jaýapta bizdiń otandasymyz «úı ıesiniń kelisiminsiz jeke múlikte turǵany úshin» jáne «aıaǵy aýyr áıelge qol kótergeni» úshin abaqtyǵa toǵytylǵan. Ol sonymen qatar AQSh-tyń kóshi-qon zańyn buzdy dep aıyptalyp otyr.

Qazirgi ýaqytta A.Kúshenova "Leon County Jail" túrmesinde. Oǵan Metıý Ýılıams esimdi memlekettik advokat taǵaıyndalǵan. Onyń isi boıynsha sot otyrysy 26 tamyzda bolady.

Bunyń aldynda AQSh-taǵy Qazaqstan Elshiliginiń konsýldyq bóliminiń keńesi boıynsha, A.Kúshenova Qazaqstanǵa oralý jóninde kýálikti alýǵa ótinish bergen. Onyń aryzy maquldanǵan, degenmen hatta jibergen adamnyń mekenjaıy kórsetilmegen.

Bul týraly A.Kúshenovanyń anasy Gúlsaıra Júnisovaǵa habardar etilgen. 2013 jyldyń ózinde Júnisova Qazaqstan Elshiligine AQSh-taǵy balasyna kómek berýin ótingen. A.Kúshenovanyń jaǵdaıyna baılanysty oǵan elge oralýǵa keńes berildi. Alaıda ol úzildi-kesildi qarsylyq tanytty.

Sol ýaqyttan beri AQSh-taǵy Qazaqstan Elshiligi A.Kúshenovanyń anasymen árdaıym baılanysta boldy. Oǵan AQSh-taǵy Qazaqstan konsýlynyń telefon nómiri de berilgen.

QR Syrtqy ister mınıstrligi A.Kúshenovanyń jaǵdaıyn jiti baqylaýda ustamaq jáne ol azamatshaǵa konsýldyq-quqyqtyq kómek kórsetip otyrady.