Qazaqstan áıelderiniń 47% bıznespen aınalysqysy keledi – zertteý

ASTANA. QazAqparat – Qazaqstanda áıelderdiń kásipkerlik salasynda belsendiligi tómen ekeni baıqalady: áıelderdiń 30% jáne erlerdiń 70% shaǵyn jáne orta bızneste eńbek etedi. Bul derekti Qazaqstandyq qoǵamdyq damý ınstıtýtynyń otbasy ınstıtýtyn zertteý ortalyǵynyń basshysy Olga Nıkolaeva aıtty, dep habarlaıdy QazAqparat tilshisi.

«Bizdiń qoǵamda áıelderge qatysty jaǵymsyz genderlik stereotıpter áıelderdiń kópshiliginiń mansaptyq ósýine kedergi keltiredi. Bul júıe áıelderdi mansap satysynda ilgeriletýdi, olardyń saıası jáne ekonomıkalyq múmkindikterin keńeıtýdi, beıbitshilik pen qaýipsizdikti qamtamasyz etý protsesine qatysýdy jáne túrli salalardaǵy áıelderdiń ózin-ózi dáleldeýdi qıyndatady. Kemsitýshilik kózqarastar men genderlik stereotıpter saldarynan áıelder belgili bir dárejede joǵary saıası pozıtsııalardan oqshaýlanyp qalǵan», - dedi spıker ortalyq kommýnıkatsııalar qyzmetinde Qazaqstandaǵy genderlik saıasattyń erekshelikterine arnalǵan brıfıngte.

Onyń aıtýynsha, Qazaqstanda áıelderdiń kásipkerlik belsendilik deńgeıi tómen, sondyqtan áıelderdiń 30 paıyzy, erlerdiń 70 paıyzy ShOB-qa tartylǵan.

Genderlik negizde jalaqynyń alshaqtyǵy, basshylyq laýazymdarda erlermen salystyrǵanda áıelder sanynyń azdyǵy baıqalady.

Sondaı-aq, áıelder kásipkerligin memlekettik qoldaý sharalary týraly aqparat keńinen taralmaǵan.

«Áıelderdiń kúıeýlerine nemese azamattyq kúıleýlerine ekonomıkalyq táýeldiligi jıi kezdesedi. Tirkelgen nemese azamattyq nekede turatyn áıelderdiń shamamen 10% ekonomıkalyq turǵydan jubaılaryna táýeldi. Jappaı saýalnamaǵa sáıkes, áıelderdiń 47,3% óz isin ashyp, bıznespen aınalysqysy keledi. Óz isin ashýǵa kedergi keltiretin eń kóp taralǵan sebep retinde áıelder qarjy tapshylyǵyn (64,7%), tájirıbeniń, bilimniń jetispeýshiligin (33%) jáne qorqynyshty (22,4%) ataǵan», - dedi O. Nıkolaeva.

Bul rette O. Nıkolaeva áıelderge arnalǵan tálimgerlik ınstıtýtyn keńeıtýdi, ekonomıkalyq qoldaýdyń qoljetimdi sharalary men olardy alý joldary týraly habardar etýdi usyndy.

Sondaı-aq memlekettik balabaqshalar jelisin keńeıtý, tegin nemese jeńildikti negizde qosymsha keshki toptar esebinen olardyń jumys ýaqytyn uzartý usynylady.

Buǵan deıin Qazaqstandyq qoǵamdyq damý ınstıtýty basqarma tóraǵasynyń orynbasary Ásem Qaıdarova elimizde áli de genderlik alshaqtyq bar ekenin aıtqan edi.