Qazaqstan aýylsharýashylyq ónimderdiń ımportynda Ázerbaıjanǵa basymdyq bermek

ASTANA. QazAqparat - Qazaqstan Ázerbaıjannan jetkiziletin 23 túrli taýardyń ımportyn arttyrýǵa nıetti. Bul týraly QR Ulttyq ekonomıka mınıstrliginiń Ázerbaıjannyń eksport pen ınvestıtsııany qoldaý qoryna (AZPROMO) joldaǵan materıalynda aıtylǵan, dep habarlaıdy QazAqparat Trend.az  saıtyna silteme jasap.

«Másele túrli aýylsharýashylyq ónimderi, sonyń ishinde kartop, qyzanaq, qııar, jańǵaq, alma, almurt, aıve, órik, shıe jáne ózgeleri týrasynda bolyp otyr», - delingen habarlamada.

Tizimge sondaı-aq shokolad, qant, temeki shıkizaty, sharaptar, kúnbaǵys maıy, sháı, janýarlar jáne ósimdik tektes maılar, atsıkldi spırt engen. Qazaqstan budan bólek, Ázerbaıjannan túrli qurylys materıaldaryn, atap aıtqanda, tsementti, qara metaldan jasalǵan metaldy konstrýktsııalardy, qubyrlar men qaptaý paketterin ımporttaýǵa qyzyǵýshylyq tanytyp otyr.

QR Ulttyq ekonomıka mınıstrliginiń málimetinshe, Ázerbaıjan ózge elderden Qazaqstanǵa jetkiziletin kartop, qyzanaq, qııar men kornıshondardy, janýarlar jáne ósimdik tektes maılardy jáne taǵamdyq maılardy tolyǵymen almastyra alady.

Mysalǵa, mınıstrliktiń aqparatyna sáıkes, Qazaqstan jyl saıyn ortasha alǵanda 10,6 mıllıon dollarǵa kartop ımporttaıdy. Bul rette, Ázerbaıjan kartobynyń ımportyn 8,3 mıllıon dollarǵa jetkizýge múmkindik bar.

Sondaı-aq Qazaqstan 56,6 mıllıon dollarǵa qyzanaq ákeledi. Ázerbaıjan eldiń bul ónimge suranysyn 87,5 paıyzǵa qamtamasyz ete alady.