Qazaqstan aýmaǵynda «Jylqy» halyqaralyq telejobasy túsiriledi - Abaev
«Búgin biz óte mańyzdy memorandýmǵa qol qoımaqpyz. QR Aqparat jáne kommýnıkatsııalar mınıstrligi osy jobany elimiz tarapynan júrgizý úshin «Qazaqstan» RTRK» AQ-ny belgiledi. Atap aıtqanda, bul joba arqyly elimizdiń ımıdjin, týrıstik múmkindikterin, sondaı-aq ǵylymı-zertteý salasyn odan ary qaraı damytýǵa úles qosamyz dep oılaımyn»,-dedi QR Aqparat jáne kommýnıkatsııalar mınıstri Dáren Abaev Ortalyq kommýnıkatsııalar qyzmetinde ótken baspasóz máslıhatynda.
Belgili bolǵandaı, derekti trılogııa boıynsha kanadalyq rejısser, antropolog Naıobı Tompson jumys isteıtin bolady.
«Bizdiń eldiń aýmaǵynda jylqy alǵash qolǵa úıretilgeni týraly derekter bar, sondyqtan osy jobaǵy qatysýǵa tıispiz. Bizden basqa osy derekti trılogııaǵa tórt memleket ókilderi qatysady. ıAǵnı Kanada, AQSh, Frantsııa jáne Germanııa qamtylyp otyr. Bul elderden de tórt telekompanııa úlesterin qosady. Birlesken joba 2018 jyly aıaqtalyp, kópshilik nazaryna usynylady»,-dedi mınıstr.
Joba arqyly elimizdiń aýmaǵynda jylqyny alǵash qolǵa úıretýdiń mán-jaıy, jylqy janýarynyń ulttyq mádenıemizde alatyn orny jáne basqa da mańyzdy aspektilerge ǵylymı túrde egjeı-tegjeıli túsinik beriledi. Osy bastama arqyly elimizdiń mádenıeti, tarıhy álemdik deńgeıde kórsetiletin bolady.
Abaevtyń paıymynsha, atalmysh týyndy álemniń 50-den astam elinde mıllıondaǵan aýdıtorııa jınaıdy dep kútilýde. Sonymen qatar mınıstr feısbýk áleýmettik jelisindegi paraqshasynda fılm elimizde, Botaı qonysynda túsiriletinin habarlady.
Budan bólek, prodıýser Nurbol Baımuhanov úsh serııaly týyndynyń túsiriliminde Almaty oblysy aýmaǵyndaǵy kórikti jerler de qamtylatynyn atap ótti.