Qazaqstan aýmaǵynda jol júrisi qaýipsizdigi aılyǵy bastaldy

NUR-SULTAN. QazAqparat – Búginnen bastap elimizdiń aýmaǵynda jol qaýipsizdigi aılyǵy bastaldy. Bul týraly QR ІІM Ákimshilik polıtsııa komıteti tóraǵasynyń orynbasary Jandos Muratálıev málim etti, dep habarlaıdy QazAqparat tilshisi.

«El aýmaǵynda 18 shildeden bastap jol júrisi qaýipsizdigi aılyǵy bastaldy. Osynyń aıasynda polıtseıler ótkizetin búkil is-sharalardyń basym baǵyty – jol-kólik oqıǵalaryn azaıtý, joldaǵy qaýipsizdikti arttyrý jáne jol júrisine qatysýshylardyń ómiri men densaýlyǵyn saqtaý úshin azamattardyń nazaryn avtojoldardaǵy jaraqattaný problemalaryn sheshýge baǵyttaý», - dedi ol mınıstrliktiń baspasóz alańynda ótken brıfıngte.

Onyń atap ótýinshe, jazǵy demalys kezeńinde jáne demalys maýsymynda qalaaralyq jáne aımaqaralyq qatynastardaǵy kólik quraldarynyń trafıgi dástúrli túrde ósedi.

Sonymen qatar ol kezeńde saldary eń qaıǵyly jaǵdaıǵa ákep soqtyratyn jol-kólik oqıǵalarynyń ósý qaýpi de artady.

«Osyǵan baılanysty, is-shara aıasynda polıtseıler patrýldeý kezinde, avtokólik quraldaryn, onyń ishinde jolaýshylar kóligin tekserýdi kúsheıtedi. Jol-kólik oqıǵalarynyń negizgi sebepteri, birinshi kezekte, júrgizýshilerdiń tártipsizdigi sanalady. Sonyń saldarynan qarama-qarsy júris jolaǵyna shyǵý, qozǵalys jyldamdyǵyn arttyrý, manevr jasaý qaǵıdalary buzý, sonymen qatar, kólikti kóp jaǵdaıda sharshańqy kúıde basqarý degen sııaqty quqyq buzýshylyqtar oryn alady. Bul rette balalardyń avtomobıl salonynda bolýy júrgizýshilerdi jol júrisi qaǵıdalaryn buzýdan toqtata bermeıdi», - dedi Jandos Muratálıev.