Qazaqstan aýmaǵyn geologııalyq zertteýmen qamtý 683,9 myń sharshy shaqyrymǵa ulǵaıady

NUR-SULTAN. QazAqparat – 2025 jyly geologııalyq materıaldardy saqtaý ınfraqurylymymen qamtamasyz etý 100 paıyz bolady. Bul týraly Ortalyq kommýnıkatsııalar qyzmetindegi baspasóz máslıhatynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

Onyń atap ótýinshe, «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasynyń «Energetıka salasyn damytý» baǵyty aýqymynda ınvestıtsııalyq tartymdylyqty arttyrý jáne geologııalyq materıaldardy saqtaý jáne óńdeý boıynsha qazirgi zamanǵy ınfraqurylymmen qamtamasyz etý kózdelgen.

«Aýmaqtyń geologııalyq zerttelýin qamtý 683,9 myń sharshy shaqyrymǵa ulǵaıady. Salanyń ınfraqurylymyn jańǵyrtý maqsatynda qor qoımasy, 2 kern qoımasy salynyp, 4 kern qoımasyna jóndeý júrgiziledi. Qabyldanǵan is-sharalar nátıjesinde 2025 jylǵa qaraı geologııalyq materıaldardy saqtaý jáne óńdeý boıynsha memlekettik ınfraqurylymmen qamtamasyz etý deńgeıi 100 paıyzǵa deıin jetkiziledi», - dedi Áset Erǵalıev.