Qazaqstan aýmaǵynyń 45 paıyzy seısmıkalyq qaýipti dep tanyldy

<p>ASTANA. KAZINFORM &ndash; Jańa Qurylys kodeksiniń jobasyna &laquo;Seısmıkalyq aımaqtardaǵy jobalaý jáne qurylys erekshelikteri&raquo; taraýy engiziledi. Bul týraly búgin Parlament Májilisinde atalǵan qujat jobasyn tanystyrý kezinde QR Ónerkásip jáne qurylys vıtse-mınıstri Tımýr Qaraǵoıshın aıtty.</p>

«Bizdiń elimiz úshin seısmıkalyq aımaqtardaǵy jobalaý jáne qurylys normalary óte mańyzdy. Óıtkeni keıingi jyldardaǵy zertteý nátıjeleri boıynsha aýmaqtyń shamamen 45 paıyzy seısmıkalyq qaýipti aımaqtarǵa jatqyzylǵan», - dedi T.Qaraǵoıshın.

Onyń aıtýynsha, nysandardyń sapasyn arttyrý úshin qurylys kompanııalarynyń seısmıkalyq oqshaýlaǵysh júıelerdi qoldanýy, seısmıkalyq qaýiptilikti aldyn ala baǵalaýdy júrgizý, qurylys alańyn tańdaý, synaqtar júrgizý boıynsha jáne basqa da keshendi sharalar qabyldaý josparlanǵan. Sondaı-aq seısmıkalyq qaýiptilikti jáne seısmıkalyq táýekeldi baǵalaýǵa qatysty tıisti retteýdiń jańa ınstıtýttary engizilip jatyr.

«Kodeks jobasynda nysannyń eskirýin anyqtaýǵa, konstrýktsııalardyń sapasyn tekserýge, obektini tozǵan dep tanýǵa, qaıta jańartý múmkindigine baǵyttalǵan qoldanystaǵy obektilerdi pasporttaý jónindegi normalar kózdelgen. Jergilikti atqarýshy organdar qurylys obektileriniń seısmıkalyq qaýiptiligi men seısmıkalyq tózimdiligin baǵalaý úshin qaýipti óńirlerde pasporttaýdy júrgizýdi qamtamasyz etýi tıis», - dedi vıtse-mınıstr.

Budan buryn habarlanǵandaı, Qurylys kodeksiniń jobasy aıasynda qurylys ınjenerlerin sertıfıkattaý qyzmeti básekelestik ortaǵa beriledi.