Qazaqstan aýmaǵyndaǵy elektromobıl sany 11 myńǵa jetti

<p>ASTANA. KAZINFORM &ndash; Dálirek aıtqanda, Qazaqstan aýmaǵynda 10 970 elektromobıl tirkelgen. Agenttik tilshisine bergen jaýabynda QR Іshki ister mınıstrliginiń baspasóz qyzmeti osyndaı derek keltirdi.&nbsp; &nbsp;</p>

«Qazaqstan aýmaǵynda 10 970 elektromobıl tirkelgen. «Qazaqstan Respýblıkasynyń keıbir zańnamalyq aktilerine kólik jáne elektrmobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Zańyna sáıkes, elektromobılderge arnalǵan oryndarda toqtaý nemese turý erejelerin buzǵany úshin ákimshilik jaýapkershilik engizildi. Sondyqtan basqa kólik júrgizýshilerine kórsetilgen oryndarǵa qoımaý eskertiledi. Odan bólek, elektromobıl júrgizýshilerine kommýnaldyq aqyly avtoturaqtarda tegin turý úshin jeńildik kózdelgen (avtoturaqtar, parkıngter)», - delingen QR Іshki ister mınıstrligi baspasóz qyzmetiniń Kazinform agenttigine bergen jaýabynda.

Foto: Aǵybaı Aıapbergenov/Kazinform

Eske salsaq, Bıyl maýsym aıynda Senat «Qazaqstan Respýblıkasynyń keıbir zańnamalyq aktilerine kólik jáne elektrmobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Zańyn maquldady. Bul zań elimizde elektromobılder sanynyń artýyna jáne arnaıy ınfraqurylymdy damytýǵa yqpal etedi.

Atap aıtqanda, álemde jyl saıyn elektrokarǵa suranys artyp jatyr. 2023 jyly elektromobıl álemdegi eń kóp satylǵan kólik boldy. Qazaqstanda da bul kólikti tańdaıtyndar kóbeıip keledi. Oǵan statıstıka dálel, ıaǵnı byltyr elektromobılder sany 10 eseden astam artty. 2022 jyly elimizde nebári 570 elektromobıl bolǵan. 

Foto: Soltan Jeksenbekov/Kazinform

Sarapshylardyń pikirinshe, elektromobılderdiń kúrt artýyna qazaqstandyqtarǵa kóliktiń ekologııalyq taza túrine kóshýi úshin memleket beretin kvota sebep boldy. Óıtkeni elektromobıldiń atmosferaǵa zııany joq. Sondyqtan memleket ony satyp alǵanda keden jáne salyq tólemderinen bosatatyn kvota berdi. Mine, osydan keıin satyp alýshylar kóbeıdi.