Qazaqstan Aýǵanstanmen saýda jáne gýmanıtarlyq baılanystardy odan ári nyǵaıtýǵa daıyn

TAShKENT. QazAqparat –Qazaqstan Aýǵanstanmen saýda jáne gýmanıtarlyq baılanystardy odan ári nyǵaıtýǵa daıyn. Bul týraly QR Syrtqy ister mınıstrliginiń Erekshe tapsyrmalar jónindegi Elshisi Talǵat Qalıev Ózbekstanda Aýǵanstan máselesi boıynsha ótken halyqaralyq konferentsııada aıtty, dep habarlaıdy QazAqparat QR SІM-ge silteme jasap.

Búgin Tashkent qalasynda «Aýǵanstan: qaýipsizdik jáne ekonomıkalyq damý» taqyrybynda halyqaralyq konferentsııa ótti. Onyń jumysyna Ortalyq Azııa memleketteriniń, Reseı, AQSh, Eýropalyq odaq, Qytaı, Úndistan, Iran, Pákistan, BUU-nyń túrli agenttikteri men ınstıtýttarynyń resmı ókilderi qatysty. Aýǵanstannan Syrtqy ister mınıstriniń mindetin atqarýshy Amır Mýttakı qatysty.

QR Syrtqy ister mınıstrliginiń Erekshe tapsyrmalar jónindegi Elshisi Talǵat Qalıev óz sózinde aýǵan máselesine biryńǵaı óńirlik kózqarastyń, BUU rólin odan ári arttyrýdyń qajettigin atap ótti. Elshi Qazaqstan Aýǵanstanmen saýda jáne gýmanıtarlyq baılanystardy odan ári nyǵaıtýǵa daıyn ekendigin málimdedi.

Qatysýshylar Aýǵanstanǵa áleýmettik jáne ekonomıkalyq problemalardy eńserýde kómek kórsetý qajettiligi týraly ortaq pikirge keldi.

Foto: gov.kz