Qazaqstan Aýǵanstanǵa bergen gýmanıtarlyq júktiń quramynda ne bar

KABÝL. QazAqparat – Qazaqstan Aýǵanstanǵa jetkizgen gýmanıtarlyq júk quramynda dári-dármek pen azyq-túlik bar. Bul týraly Úkimettiń Telegram-kanalynda málim etildi, dep habarlaıdy QazAqparat.

Buǵan deıin habarlaǵanymyzdaı, Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın gýmanıtarlyq jáne saýda mıssııasymen Kabýlǵa bardy.

Málim etilgendeı, gýmanıtarlyq júk quramyna dárilik preparattar men azyq-túlik engen.

Dári-dármek qoraptary áýe joly arqyly jetkizilse, jalpy kólemi 5 403 tonnany quraıtyn (81 vagon) negizgi gýmanıtarlyq júk temirjol kóligimen jóneltildi.

Gýmanıtarlyq kómek azyq-túlik ónimderinen (sút konservileri, ósimdik maıy, un, qaraqumyq) turady.

«Prezıdent tapsyrmasy boıynsha biz Qazaqstan halqy atynan Aýǵanstanǵa gýmanıtarlyq kómek jetkizý úshin keldik. Gýmanıtarlyq mıssııamyz qasıetti Ramazan aıyna tuspa-tus kelip otyr. Osynaý musylmdandar úshin berekeli ýaqytta barshaǵa beıbitshilik pen tynyshtyq tileımiz», — dedi Serik Jumanǵarın.

Aýǵanstanǵa sapary aıasynda Serik Jumanǵarın saýda jáne ónerkásip, syrtqy ister, baılanys jáne telekommýnıkatsııa mınıstrleriniń mindetin atqarýshy, vıtse-premer mindetin atqarýshy Abdýl Ganı Baradarmen kezdesti.