Qazaqstan aýǵandyqtardy quqyq qorǵaý qyzmetine oqytady

ASTANA. QazAqparat - Qazaqstan Respýblıkasy Іshki ister mınıstri Qalmuhanbet Qasymov Aýǵanstan Prezıdentiniń keńesshisi, Ulttyq qaýipsizdik jónindegi keńestiń basshysy Hanıf Atmarmen kezdesti, dep habarlaıdy QazAqparat QR ІІM-ge silteme jasap.

ІІM-de ótken kezdesýde Q.Qasymov sheteldik meımanǵa elimizdegi ishki ister organdary júıesi týraly áńgimeledi. Mınıstr óz sózinde qazaqstandyq polıtsııa qyzmetiniń basym baǵyttarynyń biri - esirtki bıznesine qarsy is-qımyl ekenin atap ótti. Bul baǵyttaǵy mindetter sheteldik áriptestermen ekijaqty, tipti keıde birneshe tarappen birlesip atqarylady.

QR ІІM Aýǵanstandaǵy esirtkige qarsy kúresti kúsheıtý sharalaryn qoldaý jónindegi halyqaralyq jobalarǵa belsenedi qatysady. Kezdesý barysynda bul másele de nazardan tys qalǵan joq.

Memleketter arasyndaǵy úkimetaralyq kelisim sheńberinde QR ІІM Qaraǵandy akademııasynda «Quqyq qorǵaý qyzmeti» mamandyǵy boıynsha 73 aýǵan azamatyn oqytý qarastyrylǵan, onyń 26-sy Akademııany támamdap úlgerdi.

Aýǵanstanmen aradaǵy ózara yntymaqtastyq halyqty azamattyq qorǵaý salasynda da iske asyrylýda. Qazirgi ýaqytta bul memleketke Almaty qalasynda jańadan qurylǵan Tótenshe jaǵdaılar jáne dúleı zilzalalardy azaıtý jónindegi ortalyq janyndaǵy baqylaýshy mártebesi usynylǵan.

Kezdesýge qatysýshylar esirtki bıznesine, zańsyz kóshi-qonǵa qarsy kúrestegi yntymaqtastyq, azamattyq qorǵanys salasynda ózara is-qımyl jasasýdyń, aqparat almasý jáne basqa da óńirlik qaýipsizdikti qamtamasyz etý aspektileriniń negizgi máselelerin talqylady.