Qazaqstan áýe tranzıtterine tartymdy bola túsýde
«Búgingi kúni azamattyq avıatsııa salasynyń negizgi kórsetkishteri turaqty ósýdi kórsetip keledi. 2022 jyldyń qorytyndysy boıynsha otandyq avıakompanııalar 11 mln jolaýshyny tasymaldady. Bul 2021 jylmen salystyrǵanda 17 paıyzǵa artyq. Ósý qarqyny bıyl da saqtalyp otyr. Áýe tranzıti de joǵary qarqynmen ósýde. Aǵymdaǵy jaǵdaıda Qazaqstan áýe tranzıtteri úshin neǵurlym tartymdy bola túsýde. Máselen, 2022 jyly qyzmet kórsetilgen ushý kólemi 410 myń ushaqty qurady. Bul 2021 jylǵy kórsetkishten 90 paıyzǵa kóp», - dedi mınıstr.
Onyń atap ótýinshe, Qazaqstan Respýblıkasynyń kólik-logıstıkalyq áleýetin damytýdyń 2030 jylǵa deıingi tujyrymdamasyna sáıkes, salanyń negizgi strategııalyq mindeti - ushý qaýipsizdigin qamtamasyz etý jáne elimizdiń tranzıttik áleýetin damytýǵa qolaıly jaǵdaılar jasaý.
«Azamattyq avıatsııa salasyn damytý úsh baǵytta júrgizilýde. Birinshi - ushý qaýipsizdigin qamtamasyz etý. Ekinshi - marshrýttyq jelini damytý. Úshinshi - ınfraqurylymdy damytý», - dedi Marat Qarabaev.