Qazaqstan atom energetıkasyn damytý, AES paıdalaný boıynsha Frantsııanyń tájirıbesimen tanysty
Delegatsııa quramynda QR Energetıka mınıstrliginiń, «Qazaqstandyq atom elektr stantsııalary» JShS, Ulttyq ıadrolyq ortalyq, «KEGOC» AQ jáne «Qazatomónerkásip» AQ ókilderi, Atom jáne energetıka salasyndaǵy sarapshylar bar.
Sapar sheńberinde Frantsııanyń Qarjy, Energetıka mınıstrlikterinde kezdesýler ótti, sondaı-aq AES-tyń Frantsýz operatory Eléctricité de France kompanııasymen kelissózder júrgizildi.
Eýropa jáne Frantsııanyń Syrtqy ister mınıstrligi janyndaǵy syrtqy saýda, ekonomıkalyq tartymdylyq jáne sheteldegi frantsýz azamattarynyń isteri jónindegi mınıstr-delegat Olıve Besht myrzamen jeke kezdesý ótti.
Kelissózder sheńberinde memlekettik qarajatty tartý jáne memlekettik kepildikter berý sııaqty atom jobalaryn qarjylandyrý modelderi, sondaı-aq jobalarǵa jeke ınvestıtsııalardy tartý tájirıbesi zerdelendi.
Sondaı-aq, delegatsııa «Flamanvıll» AES-te boldy. Stantsııa Sherbýr qalasynan ońtústik-batysqa qaraı 23 km jerdegi La-Mansh buǵazynyń jaǵasynda ornalasqan.
AES quramyna Framatome ázirlemesiniń (PWR) P4 qysymmen sý reaktorlary ornatylǵan eki energoblok kiredi. Bir bloktyń elektr qýaty - 1300 MVt. «Flamanvıll» AES Frantsııadaǵy barlyq tutynylatyn elektr energııasynyń shamamen 4%-yn óndiredi.
Frantsııanyń Energetıka mınıstrligimen kezdesýde QR Energetıka vıtse-mınıstri Jandos Nurmaǵanbetov atap ótkendeı, Qazaqstan kómirtekti beıtaraptyqqa baǵyt aldy, tereń dekarbonızatsııalaý boıynsha sharalardy qarastyratyn 2035 jylǵa deıingi tómen kómirtekti damý strategııasyn bekitý boıynsha jumys júrgizilýde. AES salý bolashaqta elektr energııasynyń jetispeýshiligi máselesin sheship qana qoımaı, JEK-pen qatar eldegi tómen kómirtekti generatsııany damytýǵa óz úlesin qosady.
Óz kezeginde, Frantsııa Energetıka mınıstrligi Energetıka jáne klımat bas basqarmasynyń (DGEC) basshysy Loran Mıshel bylaı dedi: «Frantsııa Qazaqstannyń energetıkany «jasyldandyrý» degen umtylysyn qoldaıdy jáne osy saladaǵy uzaq merzimdi jáne ózara tıimdi yntymaqtastyqty maqsat etedi».
AES damytýdaǵy Frantsııanyń tájirıbesin álemdegi eń keń tájirıbelerdiń biri dep ataýǵa bolady, óıtkeni búginde Frantsııa ıadrolyq reaktorlar sany boıynsha álemde (AQSh-tan keıin) ekinshi oryn alady. Bul rette eldegi elektr energııasynyń 69%-y dál AES-te óndiriledi. Sonymen qatar Frantsııa álemdegi eń iri elektr energııasyn taza eksporttaýshy bolyp tabylady jáne odan jylyna 3 mıllıard eýrodan astam qarajat alady.
Esterińizge sala keteıik, Qazaqstan el aýmaǵynda alǵashqy AES salý úshin jetekshi álemdik kompanııalardyń usynystaryn zerdeleýde. Qazirgi ýaqytta paıdalaný tájirıbesi bar úlken qýatty reaktorlyq tehnologııalary bar tórt jetkizýshiden turatyn short paraǵy jasaldy. Olardyń qatarynda koreıalyq KHNP, qytaılyq CNNC, reseılik «Rosatom» jáne frantsýzdyq EDF bar.
Foto : gov.kz