Qazaqstan astyǵy men kókóniske Reseıdiń ýaqytsha tyıymynyń áseri qandaı
«Elimizde karantındik obektiler bar, sonyń negizinde Reseı Qazaqstannan jetkiziletin kókónis, basqa da aýyl sharýashylyǵy ónimderine ýaqytsha tyıym saldy. Biraq, olardyń kóbisi qazaqstandyq ónimder emes. Men fıtosanıtarlyq sertıfıkattardy qaradym, shyǵarylǵan jeri «Ózbekstan» dep jazylǵan. Jaqynda biz Máskeýde bolyp, ekijaqty kezdesýler ótkizdik. Onda qazaqstandyq burysh, qyzanaq jáne qaýyn baryn kórdik. Olar Qazaqstanǵa ákelindi, tazartyldy jáne odan ári qaıta eksporttaldy. Árıne, bul jerde sheshilýi tıis suraqtar bar», - dedi Serik Jumanǵarın Úkimet otyrysynan keıin ótken baspasóz máslıhatynda.
Sonymen qatar vıtse-premer atalǵan ýaqytsha tyıymdar Qazaqstannyń aýyl sharýashylyǵyna sonshalyqty áser etpeıtinin aıtty.
«Iá, tyıymnyń belgili deńgeıde bıznes salasyna, zańdy jumys istep otyrǵan kásipkerlerge jáne taýarlardy qaıta eksporttaýǵa áseri bar. Onyń sebebin biz qaraýymyz kerek. Eger fıtosanıtarlyq baqylaýda qandaı da bir problema bolsa, Aýyl sharýashylyǵy mınıstrligine tıisti tapsyrma berildi», - dep tolyqtyrdy S.Jumanǵarın.
Buǵan deıin Rosselhoznadzordyń Qazaqstannan Reseıge astyq, qyzanaq, kúnbaǵysty eksporttaýdy toqtata turý týraly ótinishine qatysty Aýyl sharýashylyǵy mınıstrligi túsinik berdi.